Америка кеңәш палата әзалири байдинни хитайда тарқалған юқумлуқ кесәллики түпәйли америка билән хитай оттурисидики саяһәтни дәрһал чәкләшкә чақирған

Вашингтондин мухбиримиз уйғар тәйярлиди
2023.12.01

Хитайдики балилар яшанғанлар арисида шиддәт билән тарқилишқа башлиған сирлиқ бир нәпәс йоли юқумлуқ кесили америкиниң оһайо вә массачусетс шитатида байқалған.

Америкиниң “һәптилик хәвәрләр” (News Week) ториниң 1-декабир күнидики хәвиригә асасланғанда, оһайо шитатида балилар өпкә яллуғиға гириптар болған йәни нәпәс йоли кесәлликлири бу иштатта тарқалған. Бу учур оһаю иштатидики сәһийә тармақлири тәрипидин елан қилинған. Массачусетс шитатидиму бу хил әһвалниң көрүлгәнлики тоғрисида хәвәрләр болсиму, лекин әмәлдарлар бу әһвалларниң пәсил характерлик юқумлиниш билән мунасивәтлик икәнликини ейтқан.

Оһайо шитати варрен наһийәлик сәһийә тармақлириниң билдүрүшичә, пәйшәнбә күнигә қәдәр, 3 яштин 14 яшқичә болған балилар арисида өпкә яллуғиға гириптар болғанлар 145 болуп, оһайо сәһийә министирлиқиниң ениқлимисиға асасланғанда бу бир юқумлуқ кесәллик икән.

Мәзкур хәвәрдә дейилишичә, хитайдики балилар вә яшанғанлар арисида тарқалған нәпәс йоли юқумлуқ кесилиниң шиддәт билән тарқилиши, болупму хитай сәһийә тармақлириниң буниңға мунасивәтлик учурларни хәлқара җәмийәт билән йетәрлик ортақлашмаслиқи, үч йил бурунқи корона вирусиға охшаш вирусиниң ямрап кетиш әндишисини пәйда қилмақта икән.

 “дәвр гезити” ниң илгири сүрүшичә, хитай һөкүмити бейҗиңда турушлуқ чәт әл ахбарат васитилириниң “өпкә яллуғи” яки “тарқилишчан зукам” тоғрисида хәвәр беришигә йол қоймиған. Хитай сәһийә тармақлири вә дөләт ичидики таратқуларниңму бу юқум тоғрисида хәвәр бериши чәкләнгән.

“америка һәрбий ишлар хәвири” гә асасланғанда, бүгүн җумһурийәтчи кеңәш палата әзалиридин марко рубийо , синс вәнис, рик сикат вә томи тубирвил қатарлиқлар пирезидент байдинға хәт әвәтип, хитайда тарқалған бу вирус тоғрисида ениқ вә тәпсилий учурға еришмигүчә, хитайға саяһәт чәклимиси қоюшини тәләп қилған.

Җумһурийәтчиләр партийәсиниң кеңәш палата әзалири пирезидент байдинға мундақ дәп язған: “намәлум нәпәс йоли кесәлликлири хитайда тарқалғанлиқи үчүн, биз сизни америка билән хитай оттурисидики саяһәтни дәрһал чәкләшкә чақиримиз.”

 

 

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.