Xitay hökümiti “On minglighan kishi shinjang toghrisida sözlesh” namliq teshwiqat herikitini yolgha qoyghan

Xitay hökümiti gherb démokratik elliri teripidin “Irqiy qirghinchiliq we insaniyetke qarshi jinayet” dep xulasilen'gen siyasetlirini aqlashni asasiy nishan qilghan teshwiqat pa'aliyetlirini izchil türde kücheytiwatqanliqi melum bolmaqta.

 “Xitay xewerler tori” ning 4-séntebirdiki xewiridin qarighanda, xitay da'iriliri emdilikte bu xil teshwiqat pa'aliyitini yéngi pellige élip chiqishqa bashlighan hemde “On minglighan kishi shinjang toghrisida sözlesh” namliq bir heriketni yolgha qoyghan. Buning tunji meydan léksiyesi bolsa Uyghur élidin xitayning gu'angdung ölkisige “Yürüsh qilghan”. Buning bilen “Shinjang heqqidiki hékayilerni yaxshi sözlesh” pa'aliyitining xitay tewesige kéngiyiwatqanliqi téximu ashkara melum bolghan.

 Xewerde éytilishiche, mezkur pa'aliyet “Shinjang Uyghur aptonom rayonluq partiye komitéti tor boshluqi ishxanisi” ning teshebbusi bilen qanat yaydurulghan iken. “Heqiqiy shinjangni dunya bilen ortaqlishish” tin ibaret bash témigha xizmet qilish üchün yolgha qoyulghan bu pa'aliyet “Minglighan kishilerning shinjang heqqide sözlishi, tor alaqe pa'aliyiti, bir yürüsh qisqa sinlarni tarqitish, maqalilerni yézish we tarqitish, süret we karton filimliri” ni öz ichige alidiken.

Xitay taratqulirining xewiride “Bu pa'aliyet arqiliq shinjangning dunyagha ochuq ikenliki we özige ishinidighan yéngi qiyapiti namayan qilinidu” déyilgen. Halbuki, Uyghur diyarigha bérishqa intiliwatqan nurghunlighan axbarat xadimlirining hélihem tolimu qattiq “Wiza sinaqliri” gha duch kéliwatqanliqi yéqinqi yillarda köplep melum bolghan idi.

Xitay teshwiqatining eksiche, birleshken döletler teshkilati kishilik hoquq aliy komissari ishxanisi téxi yéqinda özliri 2022-yil 8-ayning 31-küni Uyghur élining kishilik hoquq weziyiti heqqide élan qilghan doklatning ikki yilliqi munasiwiti bilen bayanat élan qilghan idi bu doklatta xitay hökümitining qiliwatqanliri “Insaniyetke qarshi jinayet” ni teshkil qilishi mumkinliki xulase qilin'ghan bolup, xitay hökümiti rayonda yolgha qoyuwatqan namuwapiq siyasetlirining hélihem dawam qiliwatqanliqi eskertilgen. Amérika hökümiti bolsa bu heqte bergen bayanatida, xitay hökümitini Uyghur élide yolgha qoyuwatqan “Insaniyetke qarshi jinayetliri” din qol üzüp, qebih zorawanliqini derhal toxtitishqa dewet qilghan.