Хитайниң әң чоң өй-мүлүк ширкити 300 милярд доллар қәрзи билән һесабатни боғушқа буйрулған

Вашингтондин мухбиримиз әркин тәйярлиди
2024.01.29

Хоңкоңдики бир сот мәһкимиси 29-январ дүшәнбә күни хитайниң әң чоң өй-мүлүк ширкити болған хеңда гуруһини 330 милярд доллар қәрзи билән һесабатни боғушқа буйруған. Сот мәһкимисиниң бу қарари хитайда һөкүмәт иқтисадий кризисниң техиму чоңқурлишишиниң ‍алдини елиш үчүн тепирлаватқан бир пәйттә, хитайниң давалғуш ичидики пул-муамилә базириға зәнҗирсиман тәсир көрситидиғанлиқи қәйт қилинмақта.

“вашингтон почтиси” гезитиниң хәвәр қилишичә, 330 милярд доллар қәрзгә боғулуп, дуняни зилзилигә салған хеңда гуруһи 2021-йилдин бери вәйран болғанлиқини елан қилиштин өзини қачуруп, ширкәтни қайта тәртипкә селиш үчүн техиму көп вақит беришни тәләп қилип кәлгән; әмма хоңкоң сотчиси Linda Chan 29-январ күни хеңда гуруһиниң һесабатни боғушини буйруған.

Хәвәрләрдә, сотчи хеңда гуруһиниң 18 айдин бери ширкәтни қайта тәртипкә селишта һечқандақ илгириләш һасил қилмиғанлиқиға қарита юқириқи қарарни берип, униң һесабатни боғушини тәләп қилғанлиқи билдүрүлмүктә. Хитай һөкүмитиниң хоңкоң сот мәһкимисиниң қарарини етирап қилиши билән хәлқара қәрз игилириниң мәзкур ширкәтниң мүлкини игилишигә йол қоюш-қоймаслиқи мәлум әмәс. “вашингтон почтиси” гезитиниң хәвиридә, сотниң қарари хитай иқтисадиниң бәштин бир қисмини тәшкил қилидиған хитай өй-мүлүк базирида әндишини күчәйтидиғанлиқи, дуняниң 2-чоң иқтисадий гәвдиси болған хитай иқтисадини тәвритидиғанлиқини билдүргән. Мәлум болушичә, нөвәттә 330 милярд доллар қәрзгә боғулған хеңда гуруһиниң хитай миқясида нәччә йүзләрчә техи пүтмигән туралғу өй районлири бар икән.

Хоңкоң сот мәһкимисиниң қарариниң арқисидин хеңда гуруһиниң хоңкоң аксийә базиридики пай чеки бирақла 20 пирсәнттин артуқ чүшүп кетип, хеңда гуруһи пай чеки содисини тохтатқан. 240 Милярд долларлиқ мал-мүлки бар дәп қаралған хеңда гуруһи, 2021-йилидин башлап қәрзини қайтуралмайдиған әһвалға чүшүп қалған иди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.