Xitayning pay chéki baziri shiddet bilen töwenlimekte

“Heptilik xewerler” ning 16-yanwardiki obzorida éytilishiche, birnechche yildin buyan dawam qiliwatqan iqtisadiy kasatchiliq tüpeylidin xitayning pay chéki baziridiki dawalghush nöwette téximu éghirlashqa yüzlen'gen.

Obzorda éytilishiche, xitay iqtisadining muhim ghol liniyelirining biri öy-mülük sahesi bolup, xitayning bu sahediki ziyini töt tirilyon amérika dolliridin éship kétish éhtimali bar iken. Bolupmu xitayda alliqachan pütüp bazargha sélinip bolghan, emma sétilmay turuwatqan öyler az dégendimu üch milyard kishige yétidighan bolup, bunche köp öyning bésilip qélishi öy-mülük sahesi üchün ghayet zor krizis bolup turmaqtiken. Netijide banka sistémisining dawalghushta qélishi bilen öy-mülük baziri téximu kasatlashqan.

Banka we öy-mülük baziridiki bu xil krizislar tebi'iy rewishte xitay pay chéki bazirigha biwasite tesir körsitishke bashlighan. “Pul-mu'amile waqti” gézitining bu heqtiki xewiride éytilishiche, nöwette xitay pay chéki baziridiki omumiy körsetküch tarixtiki eng töwen sewiyege chüshüp qalghan. Bu hal aldinqi yildiki oxshash mezgilge sélishturghanda 25 pirsenttin köprek töwenligen. Pay chéki baziridiki bu xil töwenleshni kontrol qilish üchün xitay hökümiti meblegh salghuchilargha qaritilghan bezi cheklimilerni ijra qilishqa kirishken hemde ularning zor sandiki pay cheklirini sétishqa bolmaydighanliqini belgiligen. Emma bu hal tézdin ghayet zor qarshiliqqa duch kelgenliki üchün 2024-yilining birinchi heptisi xitay hökümiti bu xil cheklimilerning bezilirini emeldin qaldurushqa mejbur bolghan.

Obzorda éytilishiche, xitay rehberliri dölet igidarchiliqidiki mebleghni ishlitish yaki pul-mu'amile sistémisining meblighini serp qilish bedilige ghayet zor pay chékini sétiwélishni xalimighanliqi üchün chet'ellik meblegh salghuchilar 2023-yilidin buyan xitay pay chéki bazirigha salghan meblighini zor kölemde chékindürüp kétishke bashlighan. Bumu xitay pay chéki bazirining nöwettiki téz sür'etlik chékinishidiki muhim seweblerdin bolup qalghan.