Xitay hökümiti her qanche chare qollansimu, xitay pulining dawamliq paxallishish éhtimali bar iken

Washin'gtondin muxbirimiz jewlan teyyarlidi
2023.08.23

Xitay iqtisadining chékinishige egiship, xitayning pay chéki baziri chüshüp, xitay pulining qimmiti dawamliq töwenlewatqan bolup, bu ehwalda xitay pulining dunya pul-mu'amile saheside dollargha oxshash inawet qazinishi nahayiti qiyin iken.

“Blombérg xewerliri” torining 21-awghust küni xewer qilishiche, xitay pulining bir dollargha teng kélidighan qimmiti ötken heptidila 7 yüen 30 sénttin halqighan bolup, ötken yildin buyanqi eng töwen nuqtigha chüshüp qalghan. Xitay bankisi qayturma hujumgha ötüp, dollarni paxal qilip satidighanliqini dawrang qilghan. Emma hazir dollarmu melum nisbette paxallishiwatqan bolup, xitay terep gerche qolidiki dollarni bir terep qiliwetsimu, xitay pulining dawamliq paxallishishini tosup qalalmaydiken.

Xitay hökümiti xitay pulining qimmitini saqlap qélish üchün qerzning ösüm nisbitini chüshürüsh usulini qollan'ghan, amérika bolsa ösüm nisbitini östürgen, bu ehwalda xitay pulining qimmiti yene 9 pirsent etrapida töwenleydiken. Xitay pulining bir dollargha teng kélidighan qimmiti 7 yüen 50 sintqimu bérip qalidiken.

Xewerde körsitilishiche, xitay hökümiti ezeldin pul-mu'amile sistémisini bir qolluq bashqurup kéliwatqan bolup, burun bir mezgil xitay pulini paxallashturush arqiliq sodida nep élish taktikisini ishqa salghan. Emma bundaq qilishning xetirimu bar bolup, eger xitay iqtisadi bir qeder küchlük bolmighinida, xitay pulining kursi biraqla chüshüp kétip, iqtisadiy krizis kélip chiqidiken.

Xitay hökümiti ilgiri xitay pulini biraziliye, rusiye, hindistan we jenubiy afriqadin ibaret “Kések döletler” ittipaqining kozir puli qilip, xelq'arada dollarning ornigha dessitishke urunup kéliwatqanidi؛ nöwette xitay iqtisadi chékiniwatqan bu weziyette xitay pulining kursi chüshüp, xelq'arada inawetlik pul birliki bolush éhtimalimu zor derijide töwenleydiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.