Хитай һөкүмити “шинҗаң яхши җай” тәшвиқатини кеңәйтмәктә

Вашингтондин мухбиримиз әзиз тәйярлиди
2023.06.13

Хитай һөкүмити башқурушидики “тәңритағ” ториниң 13-июндики хәвиридә ейтилишичә, хитай һөкүмити шу күни қәшқәр шәһиридә “2023-йиллиқ саяһәтчиликни тәрәққий қилдуруш чоң йиғини” вә “‛шинҗаң яхши җай‚ саяһәтчиликини тонуштуруш йиғини” чақирған.

Хәвәрдә ейтилишичә, йиғин күнлиридә уйғур дияридики саяһәтчиликни раваҗландуруш һәққидә ичкири хитайдики ширкәтләр билән бир қатар келишимләр имзаланған. Бу қетимқи йиғинға хитай мәдәнийәт вә саяһәт министирлиқиниң иштирак қилиши буниң мәркизий һөкүмәтниң бир қоллуқ орунлаштуруши икәнликини көрситип бәргән.

Бу саяһәтчилик тәшвиқати хитай һөкүмити йеқинда оттуриға қойған “қәшқәрни һәрқайси милләтләр юғурулуп кәткән көп милләтлик инақ маканға айландуруш” шоари билән тәңла оттуриға чиққан болуп, хитайниң аввал бу шәһәрни өзгәртиш, андин саяһәтчиләрни җәлп қилиш ғәризини ипадилигән.

Хитай һөкүмити йиллардин буян уйғур дияридики һәрқайси җайларни “саяһәт нуқтиси” шәклидә тәшвиқ қилип кәлгән болуп, әмдиликтә қәшқәрни “шинҗаң яхши җай” тәшвиқатидики мәркизий нуқтиға айландуруши уларниң “биңтуән билән йәрликни бирләштүрүш”, “җәнубий шинҗаңниң нопусини әлалаштуруш” қатарлиқ истратегийәлик шоарлири билән мас қәдәмдә оттуриға чиқиватқанлиқи мәлум.

Хитай һөкүмитиниң бу хилдики “саяһәт қилтиқи” һәққидә тохталған сиясий анализчи ева шяв өзиниң бу һәқтә “ташқи сиясәт” журнилиниң 24-май санида елан қилған обзорида, хитай һөкүмитиниң уйғур дияридики қирғинчилиқни һелиһәм давамлаштуруватқанлиқини, әмма хәлқарани алдаш үчүн бу җайни “саяһәтчилик базиси” шәклидә тәсвирләп, лагер вә бастуруш җинайәтлирини йошурушқа урунуватқанлиқини көрситип өткәниди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.