Уйғурларни бастурушта қоли болған хитай техника ширкити Hikvision ниң пай чеки қаттиқ чүшүп кәткән

Америка малийә министирлиқиниң уйғурларни бастурушта қоли болған хитай назарәт техникиси ширкитиHikvision ни җазалашқа тәйярлиқ қиливатқанлиқи һәққидики хәвәрләрдин кейин, бу ширкәтниң пай чеки қаттиқ чүшүп кәткән. Мәзкизи хитайниң хаңҗов шәһридики бу ширкәт 2017-йили уйғур елида башланған чоң тутқунда хитай һөкүмитигә һәмкарлишип, униң районда дигитал назарәт системиси қурушиға ярдәмләшкән.

У хитайниң лагер, түрмә, қайта тәрбийәләш мәркәзлири, мәҗбурий әмгәк орунлири, мәктәп, мәсчид, мәһәллә вә җамаәт сорунлириға йүз тонуш камераси орнитип, хитайниң уйғурларни бастурушидин зор пайдиға еришиш билән әйибләнгән иди.

Америка малийә министирлиқи 2021-йили бу ширкәтни “қара тизимлик” кә киргүзгән. “малийә вақти” гезити 4-май күни малийә министирлиқиниң бу ширкәтни йәниму илгириләп “дөләтлик алаһидә бәлгиләнгәнләр тизимлики” гә киргүзүшкә тәйярлиқ қиливатқанлиқи хәвәр қилғандин кейин, бу ширкәтниң пай чеки 5-май күни 10 пирсәнт чүшүп кәткән иди. Бирақ “җәнубий хитай әтигәнлик почтиси” гезитиниң хәвәр қилишичә, униң шенҗин аксийә базиридики пай чеки 6-май күни давамлиқ чүшкән. Хәвәрдә униң пай чекиниң җүмә күни 9 пирсәнт чүшүп кәткәнликини билдүргән.

Хитай ташқий ишлар министирлиқи 5-май күни америка малийә министирлиқиниң қарариға инкас билдүрүп: “американиң кишилик һоқуқ вә башқа сәвәбләрни көрситип, һоқуқни сүйиистимал қилишиға вә хитай ширкәтлирини намувапиқ бастурушиға қатий қарши туримиз” дегән. Лекин “малийә вақти” гезитиниң ейтишичә, нөвәттә америка һөкүмити Hikvision тоғрисида ‍өзиниң шерик дөләтлиригә мәлумат беришни башлиған.