Uyghurlarni basturushta qoli bolghan xitay téxnika shirkiti Hikvision ning pay chéki qattiq chüshüp ketken

Amérika maliye ministirliqining Uyghurlarni basturushta qoli bolghan xitay nazaret téxnikisi shirkitiHikvision ni jazalashqa teyyarliq qiliwatqanliqi heqqidiki xewerlerdin kéyin, bu shirketning pay chéki qattiq chüshüp ketken. Mezkizi xitayning xangjow shehridiki bu shirket 2017-yili Uyghur élida bashlan'ghan chong tutqunda xitay hökümitige hemkarliship, uning rayonda digital nazaret sistémisi qurushigha yardemleshken.

U xitayning lagér, türme, qayta terbiyelesh merkezliri, mejburiy emgek orunliri, mektep, meschid, mehelle we jama'et sorunlirigha yüz tonush kamérasi ornitip, xitayning Uyghurlarni basturushidin zor paydigha érishish bilen eyiblen'gen idi.

Amérika maliye ministirliqi 2021-yili bu shirketni “Qara tizimlik” ke kirgüzgen. “Maliye waqti” géziti 4-may küni maliye ministirliqining bu shirketni yenimu ilgirilep “Döletlik alahide belgilen'genler tizimliki” ge kirgüzüshke teyyarliq qiliwatqanliqi xewer qilghandin kéyin, bu shirketning pay chéki 5-may küni 10 pirsent chüshüp ketken idi. Biraq “Jenubiy xitay etigenlik pochtisi” gézitining xewer qilishiche, uning shénjin aksiye baziridiki pay chéki 6-may küni dawamliq chüshken. Xewerde uning pay chékining jüme küni 9 pirsent chüshüp ketkenlikini bildürgen.

Xitay tashqiy ishlar ministirliqi 5-may küni amérika maliye ministirliqining qararigha inkas bildürüp: “Amérikaning kishilik hoquq we bashqa seweblerni körsitip, hoquqni süyi'istimal qilishigha we xitay shirketlirini namuwapiq basturushigha qat'iy qarshi turimiz” dégen. Lékin “Maliye waqti” gézitining éytishiche, nöwette amérika hökümiti Hikvision toghrisida ‍özining shérik döletlirige melumat bérishni bashlighan.