Uyghur aptonom rayonluq siyasiy kéngishi xitayning “Yéngi dewrdiki shinjangni bashqurush” siyasitini toluq we toghra ijra qilishni telep qilghan

Xitayning “Shinjang saqchi höjjetliri” ashkarilinip, lagérdiki wehshiylikler dunyani zil-ziligha salghan bir waqitta Uyghur aptonom rayonluq siyasiy kéngishi qarar maqullap, xitayning “Yéngi dewrdiki shinjangni bashqurush” siyasitini dawamliq toluq izchillashturushni telep qilghan. “Shinjang” gézitining xewer qilishiche, bu qarar 24 we 25-may künliri échilghan Uyghur aptonom rayonluq 12-nöwetlik siyasiy kéngesh da'imiy komitétining 21-qétimliq yighinida maqullan'ghan. Qararda, “Shinjangni bashqurush istratégiyesi” ni toluq we toghra yolgha qoyushta “Jungxu'a millitining büyük güllinishi we dunyadiki misli körülmigen yüz yilliq özgirishlerning omumiy istratégiyelik weziyitini közde tutush” tekitlen'gen.

Weziyettin xewerdar közetküchilerning éytishiche, aptonom rayonluq siyasiy kéngeshning hazirqidek nazuk bir waqitta bundaq bir qarar maqullap élan qilishi, 2017-yilidin béri xitayning rayondiki wehshiyliklirige qatnashqan we uninggha shérik bolghan apparat we shexslerni “Siyasette ‍özgirish” bolmaydighanliqi, ‍ötken besh yilliq wehshiylikning jawabkarliqi toghrisidimu xatirjem qilishni meqset qilidiken. “Shinjang saqchi höjjetliri” b d t kishilik hoquq aliy komissari mishél bachélét Uyghur élide ziyarette bolidighan halqiliq bir waqitta ashkarilan'ghan.

“Shinjang” gézitining éytishiche, qararda “Shinjangni bashqurush istratégiyesi” ni dawamliq izchillashturush bir waqitta, “Jungxu'a milliti ortaq éngini mustehkemlesh, shinjangda islam dinini xitaychilashturushni algha sürüsh, shinjangni medeniyet arqiliq ozuqlandurush qurulushini emeliyleshtürüsh we yuqiri süpetlik iqtisadiy tereqqiyatni algha sürüsh hazirqi basquchtiki bash tartip bolmaydighan mes'uliyet” dep körsitilgen. Qararda yene xitay-yawropa yük poyizining aliy süpetlik tereqqiyatini algha sürüp, ürümchi ichki quruqluq porti qurulushi, qorghas, qeshqer iqtisadiy échiwétish rayoni we chöchek nuqtiliq échiwétish sinaq rayonining rolini toluq jari qildurush tekitlen'gen.