Үрүмчидә хитай сот мәһкимилириниң "ярдәм бериш" йиғини ечилди

Мухбиримиз әзиз
2021-07-07
Share

Хитай һөкүмити башқуришидики "тәңритағ тори" ниң 7-июлдики хәвиридә ейтилишичә, бир күн илгири "мәмлкәтлик сот мәһкимилириниң шинҗаңға ярдәм бериш хизмәт йиғини" үрүмчидә чақирилған. Уйғур дияридики компартийә секретари чен чуәнго вә мәмликәтлик алий сот мәһкимисиниң башлиқи җов чяң қатарлиқлар йиғинға қатнашқан.

Хәвәрдә ейтилишичә, чен чуәнгу мәхсус сөз қилип алий сот мәһкимиси вә һәрқайси хитай өлкилири сот мәһкимилириниң "шинҗаңға ярдәм бериш муһим сиясий вәзипә" дегән қарашниң йетәкчиликидә иҗтимаий муқимлиқ вә узақ мәзгиллик әминлик үчүн муһм ярдәмләрдә болғанлиқиға алаһидә рәһмәт ейтқан. У бу һәқтики сөзидә: "һәрқайси қериндаш өлкә вә шәһәрләрдики сот мәһкимилириниң бундин кейинки хизмитимизгә илгирикидәк қизғин ярдәмдә болушини һәмдә қоллап беришини үмид қилимән," дегән.

Җов чяңму бу һәқтики сөзидә өзлириниң "қанун ярдими" ни айимайдиғанлиқини, буниң хитай рәиси ши җинпиң тәкитлигән "йеңи дәврдики шинҗаңни идарә қилиш истратегийиси" ниң муһим мәзмуни икәнликини билдүргән.

Муһаҗирәттики анализчилар бу хитай сот мәһкимилириниң өткән бирнәччә йилда уйғур дияридики халиғанчә қолға елиш вә сот тәртиписизла қамаққа һөкүм қилишқа ярдәм бәргәнләр икәнликини алға сүрди. Радийомизниң бу һәқтики дәлилләшлириму лагерларға қамалған миңлиған уйғурниң сотланмайла еғир қамаққа һөкүм қилинғанлиқини испатлиған иди. Өткән бирнәччә йилда пүтүн хитай миқясидики өлүм җазаси вә еғир қамақ җазалириниң 20 пирсәнттин артуқрақиниң пүтүн хитай нопусиниң бир пирсәнтигиму йәтмәйдиған уйғур диярида әмәлгә ашқанлиқи мәлум болған иди. "хитай кишилик һоқуқ һемайичилири" тәшкилатиниң рәиси рене шя бу һәқтики баянатта "бу һал уйғурларниң хитай һөкүмити иҗра қиливатқан ‹үч хил күчләргә қарши туруш' һәркитиниң қурбанлири болуп кетиватқанлиқиниң бир испати," дегән иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт