Хитайниң илмий тәтқиқат әсәрлиригә сүзгүч салмақчи болуши хәлқараниң қаттиқ тәнқидигә учриди

Мухбиримиз әзиз
2017-08-22
Share

Камбрич университети нәшриятиниң хитай һөкүмитиниң тәлипини рәт қилип, тор бетидин өчүрүветилгән мақалиләрни әслигә кәлтүрүши илим саһәсиниң алқишиға еришиш билән биргә, хитай һөкүмитиниң хәлқарадики илмий тәтқиқат дунясиға тор сүзгүчи салмақчи болуши күчлүк тәнқидкә учриди.

"вашингтон почтиси" гезитиниң бүгүнки баш мақалисидә, хитай һөкүмитиниң "назук" темилардин болған тибәтләр, уйғурлар, тйәнәнмен қирғинчилиқи қатарлиқ мәсилиләр һәққидики тәтқиқат мақалилиригә сүзгүч салмақчи болуши, әмәлийәттә хитайдики пуқраларни давамлиқ һалда зулмәттә қалдурмақчи болғанлиқтин башқа нәрсә әмәс, дейилиду.

Мақалидә көрситилишичә, хитай һөкүмитиниң "ғәрб дуняси хитай билән сода қилиш-қилмаслиқни таллаш әркинликигә игә. Әмма биз билән сода қилмақчи болидикән, җәзмән хитайниң қанунлириға һәмдә йосунлириға һөрмәт қилиши лазим" дегән баянлири әмәлийәттә ғәрб дунясини хитай һөкүмитиниң хәлқни бастуридиған қанунлириға бойсунушқа қистиғанлиққа баравәр икән.

Бу һал ғәрб дунясиниң йиллардин буянқи хитайға тәсир көрситиш, очуқ ‏-ашкара болуш, қанун арқилиқ идарә қилиш вә демократийә идийилирини сиңдүрүш тиришчанлиқиниң ши җинпиң һакимийити тәрипидин тосқунлуққа учраватқанлиқиниң ипадиси икән.

"муһапизәтчи" гезитиниң бу һәқтики мақалисидә бу мәсилиләр "амазон", "алма" қатарлиқ ширкәтләрниң хитайда сетилидиған бир қисим мәһсулатлириға сүзгүч селиниш билән бирләштүрүп тәһлил қилинған һәмдә буни "тор сүзгүчлүкиниң йеңи пәллиси" дәп атиған.

"нюйорк вақти" гезитиниң бу һәқтики мақалисидә болса, хитайниң бу қилмиши әйиблинип "илмий тәтқиқат саһәси вә университетларниң тәтқиқат нәтиҗилиригә сүзгүч селиш әмәлийәттә хитайниң дуняға бәргән вәдисигә пүтүнләй зит келиду" дейилгән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт