Xitay da'iriliri taylandta “Shinjang yaxshi jay” teshwiqat pa'aliyiti uyushturghan

Washin'gtondin muxbirimiz irade teyyarlidi
2024.10.24

Xitay hökümitining nöwette gherb démokratik döletliri teripidin “Irqiy qirghinchiliq we insaniyetke qarshi jinayet” dep atiliwatqan siyasetlirini aqlashni meqset qilghan teshwiqat heriketlirini zor küch bilen qanat yayduruwatqanliqi melum.

Xitayning “Tengritagh tori” ning xewiridin qarighanda, xitay da'iriliri 21-öktebir küni taylandta “Shinjang yaxshi jay” namliq bir teshwiqat axbarat yighini uyushturghan bolup, yighinda Uyghur aptonom rayonluq xelq qurultiyi da'imiy komitétining mudiri zumret obul sözlitilgen.

Xitay hökümiti xelq'arada qanat yayduruwatqan teshwiqat heriketliride Uyghur emeldarlirini ishqa séliwatqan bolup, zumret obul shu xildiki teshwiqatlarda dawamliq halda “Bash rol” oynap kelgen xitay rehbiri bolup hésablinidu.

Taylandta ötküzülgen bu qétimliq teshwiqat axbarat yighinidimu zumret obul “Uyghur élining “Her qaysi sahelerde zor tereqqiyatlargha érishkenlikini, shinjangda her millet kishilirining xushal-xuram yashawatqanliqini” sözlep, taylandliqlarni Uyghur élini ziyaret qilip, “U yerdiki iqtisadiy, ijtima'iy tereqqiyat we özgirishlerni öz közi bilen körüshke teklip qilghan”.

Bu yighin'gha yene xitayning taylandta turushluq bash elchisi xen jichyangmu qatniship söz qilghan. Melum bolushiche, bu pa'aliyetni xitayning taylandtiki bash elchixanisi bilen “Shinjang dostluq almashturush guruppisi” birlikte uyushturghan bolup, uninggha tayland parlaménti yuqiri palatasi tashqi ishlar komitétining re'isi we tayland parlaméntining we hökümitining ezaliri qatnashqan.

Tayland da'iriliri 2014-yili xitaydin qéchip chiqishqa mejbur bolghan 220 neper Uyghurni tayland-malaysiya chégrasigha yéqin sungxla dégen jayda qolgha alghanidi. Bu Uyghur tutqunlar ichidiki 109 neper qoramigha yetken er, 2015-yili 7-ayda körsitilgen barliq tirishchanliqlargha qarimay xitaygha ötküzüp bérilgen. Hazir xelq'araning bésimi bilen xitaygha qayturulmighan, biraq dawamliq tayland türmiside tutup turuluwatqan 40 tin oshuq Uyghur mehbus barliqi melum. Taylandtiki kishilik hoquqni yaqilaydighan bir qisim organ we shexsler bu Uyghurlarning bixeter 3-döletke qoyup bérilmeslikidiki birdinbir sewebning tayland hökümitining xitayning bésimidin qorqushi, xitay bilen munasiwitini buzuwélishni xalimasliqi, dep körsetkenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.