Хитайниң америка үчүн “әң чоң тәһдит” икәнлики барғансери айдиңлашмақта

“фокс хәвәрлири” ниң 17-декабирдики хәвиридә ейтилишичә, америка дөләт мәҗлисидики “америка-хитай истратегийәлик риқабәт пәвқуладдә комитети” ниң әзалиридин карлос гименез (Carlos Gimenez) хитайни америка үчүн “әң чоң тәһдит” дәп көрсәткән. Шундақла вәзипигә олтуруш алдидики пирезидент доналд трампниң “мадарачилиқ билән әмәс, бәлки күч билән тинчлиқни әмәлгә ашуридиғанлиқи” ни әскәрткән.

Авам палата әзаси карлосниң қаришичә, хитай һазир тор һуҗумидила әмәс, техиму муһими һәрбий вә иқтисадий җәһәттинму америка үчүн “әң чоң дүшмән” болуп қалған. Болупму хитайниң дунядики әң чоң ишләпчиқириш базиси икәнлики, америка тәвәсидики дөләт мудапиә вә һәрбий тәйярлиқ әшялириниң ишләпчиқирилиши көләм җәһәттә хитайға йәтмәйдиғанлиқи, навада икки тәрәп узунға созулған урушқа кирип қалса вәзийәтниң америка үчүн хәтәрлик болуп қалидиғанлиқи буниңдики әң муһим амиллар һесаблинидикән. У мушу әһвалларни санап келип, “русийә-украина уруши бизниң дөләт мудапиә әшялирини ишләпчиқириш қабилийитимизниң җиқ төвәнләп кәткәнликини көрсәтти” дегән.

Гименезниң қаришичә, йеңи һөкүмәт дәл мушу аҗизлиқни түгитишкә зеһин қойидиған болуп, буниң үчүн көплигән хусусий ширкәтләрниң бу саһәгә қатнишиши, шуниңдәк америка һөкүмәт системисидики бюкратлиқни түгитиш зөрүр қәдәмләр һесаблинидикән. Йәнә келип америка сиясий саһәси америка үчүн кимниң дүшмән, кимниң дост икәнликини, шуниңдәк өзиниң қандақ аҗизлиқи барлиқини билишму муһим икән. У бу һәқтә сөз болғанда, “йиллардин буян хитай бизни җиқ ойнитип кәтти” дегән.

Униң қаришичә, бу җәһәттики хушаллинарлиқ йүзлинишниң бири, “америка-хитай истратегийәлик риқабәт пәвқуладдә комитети” икки партийә әзалиридин тәшкил тапқан болсиму, “хитай тәһдити” мәсилисидә уларниң пикри бирдәк икән. Улар изчил “хитай биз үчүн тәһдит болуп кәлгән, бундин кейинму тәһдит болиду” дәп қарайдикән.