Xitay tehditige qarshi herbiy manéwirgha qatnishidighan yawropa döletliri köpeygen

Gérmaniye, italiye we firansiye qatarliq döletler hindi-tinch okyan rayonigha herbiy paraxot we ayropilanlirini ewetishke bashlighan.

Yaponiye “Nikkiy asiya” gézitining xewer qilishiche, yuqiriqi yawropa döletlirining amérika we yaponiyege qoshulup, hindi-tinch okyanda herbiy mewjutluqini kücheytishi misli körülmigen heriket bolup, u bu döletlerning künsayin zoriyiwatqan xitay tehditi we hemde rusiyege qarshi ortaq küresh qilish iradisini namayan qilip béridiken.

Xewerde, “Gérmaniyening bu qétim tinch okyan'gha téximu köp herbiy eslihelerni ewetidighanliqi, hetta tarix boyiche asiya diplomatiyesige anche qiziqmay kelgen ispaniye, italiye qatarliq döletlerningmu qatnishidighanliqi” bayan qilin'ghan.

Melum bolushiche, gérmaniyening paraxot etriti we teminlesh paraxoti 7-may seyshenbe küni gérmaniyening wilxélmshawén we bashqa jayliridin tinch okyan'gha qarap yolgha chiqqan, italiyening ikki herbiy paraxotimu tinch okyan'gha qarap yolgha chiqqan.

Yuqiriqi döletlerge a'it bu herbiy paraxotlar, bu yil 6-ayning 29-künidin 8-ayning 4-künigiche amérika bashchiliqida haway taqim aralliri we uning etrapidiki rayonlarda ötküzülidighan herbiy manéwirgha ishtirak qilidiken. Mezkur manéwirning meqsiti xitayning hindi-tinch okyandiki tehditige taqabil turushni meqset qilidiken.

Bu manéwirgha qatnishidighan döletler amérika, en'gliye, awstraliye, birunéy, kanada, chili, kolombiye, daniye, ékwador, firansiye, gérmaniye, hindistan, hindonéziye, isra'iliye, yaponiye, malaysiya, méksika, gollandiye, yéngi zélandiye, péru, koréye, filippin, sin'gapor, sirilanka, tayland, ton'ga qatarliq 26 döletni öz ichige alidiken.

 “Nikkiy asiya” géziti, italiyeningmu bu manéwirgha ishtirak qilidighanliqini bildürgen.

Her ikki yilda haway we uning etrapida élip bérilidighan bu herbiy manéwir dunyadiki eng chong déngiz urushi manéwiri bolup hésablinidiken.