Erkinlik sariyi: “Xitay hökümitining Uyghur muxbirlargha qilghan tehdit we hujumliri köpiyiwatidu”

Amérikadiki tesiri chong kishilik hoquq teshkilatliridin biri bolghan “Erkinlik sariyi” 2023-yili 12-ayning 6-küni élan qilghan doklatida, mustebit hökümetlerning muhajirettiki muxbirlargha séliwatqan tehdit we hujumlirining köpiyiwatqanliqini otturigha qoyghan. Bu doklatta yene mustebit xitay hökümitining amérikidiki Uyghur muxbirlargha, bolupmu ularning a'ilisige tehdit sélishi we bashqa hujumlirining köpiyiwatqanliqi alahide tilgha élin'ghan.

Doklatta mundaq déyilgen: “Mustebit hökümetler jismaniy jehettin jazalashni öz ichige alghan mejburlash we qorqutush wasitiliri arqiliq amérika we bashqa gherb döletliridiki muxbirlarni jimiqturushqa urunup kelmekte” .

“Erkinlik sariyi” 2014-yildin bashlap, 26 mustebit hökümet teripidin élip bérilghan, her qaysi döletlerde ishlewatqan muxbirlarni tutqun qilish, yaridar qilish we qestlep öltürüsh urunushlirini öz ichige alghan 112 weqeni xatiriligen. Lékin bu san peqet heqiqiy omumiy sanning bir qismigha wekillik qilidiken.

Mezkur doklatta yene mundaq déyilgen: “Hazir amérikida erkin asiya radiyosining muxbiri bolup ishlewatqan gülchéhre xoja xitayning kishilik hoquq depsendichiliki toghrisidiki xewerliri üchün xitayning öch élish nishani qilin'ghan Uyghurlarning biri. Uning Uyghur ilidiki 20 nechche tughqanliri xitay da'iriliri teripidin parakendichilikke uchrighan we qolgha élin'ghan, beziliri lagérlargha qamalghan” .

Ilgiri, erkin asiya radiyosida ishlewatqan memetjan jüme, nur'iman abduréshit we eset sulayman xitayning kishilik hoquq depsendichiliki toghrisidiki xewerliri üchün xitay teripidin öch élin'ghan؛ ularning 50 din köp tughqini xitay da'iriliri teripidin parakendichilikke uchrighan we qolgha élin'ghan, beziliri lagérlirida qamalghanliqi heqqide doklat élan qilin'ghanidi.