Таҗсиман вируси үрүмчи вә қәшқәрдә тездин ямрашқа башлиди

Мухбиримиз әзиз
2020.07.21

Йеқиндин буян хитай һөкүмити аллиқачан толуқ контроллуқ астиға елинғанлиқини давраң қиливатқан таҗсиман вирусиниң үрүмчи вә қәшқәрдә тездин ямраватқанлиқи түрлүк учур йоллиридин мәлум болушқа башлиди.

Хитай һөкүмитиниң шинхуа агентлиқи 20-июлдики хәвиридә шуниңғичә болған мәзгилдә үрүмчидә йеңидин мәлум болған вирус юқумдарлириниң 47 гә йәткәнликини, аламәтсиз юқумланғучиларниң 50тин ешип кәткәнликини хәвәр қилди. Буниң ‍ичидә қәшқәрдә байқалған юқумдардин бири барлиқи ейтилиду.

Хәвәрдә ейтилишичә, үрүмчи шәһиридә йеңидин байқалған таҗсиман вируси юқумдарлири асасән тәңритағ райони вә сайбағ районидин болуп, әһвалдин хәвәрдар кишиләр бу җайларниң үрүмчидики уйғурлар топлишип олтурақлашқан җайлар икәнликини билдүрмәктә.

Әһвалдин хәвәрдар кишиләрниң билдүрүшичә, үрүмчи вә қәшқәр шәһәрлиридә бир һәптилик “шәһәрни қамал қилиш” тәдбири елинған. Әмма һазирчә буниң бир һәптидин кейин бикар қилинидиғанлиқи яки давам қилидиғанлиқи ениқ әмәс икән. “хитай хәвәрлири” ториниң 20-июлдики хәвиридә ейтилишичә, үрүмчи шәһиридики бир қисим җайларда өйлиригә қамилип қалған кишиләрниң күндилик турмуш буюмлирини сетивелиши җәрянида бир қисим кишиләрниң һаянкәшлик вә сахтипәзлик қилмишлиридин 37 қетимлиқи қанун бойичә бир яқлиқ қилинған.

Һалбуки муһаҗирәттики уйғурларниң һәммидинму бәк әндишә қиливатқини хитай һөкүмитиниң көп қетимлап испатланған ялғанчилиқ қилмиши болуп, бу қетим елан қилинған юқумдарлар санидин зор дәриҗидә гуман қилмақтикән. Йәнә бир яқтин шәһәрни қамал қилиш чарисиниң нурғун сандики уйғурларни күтүлмигән ачарчилиққа гириптар қилғанлиқи өткән мәзгилләрдә көп қетим испатланған болғачқа бу қетимму ашу хилдики еғир паҗиәләрниң йүз беришидин, шундақла тездин ямраватқан вирусниң лагерларға тарқилип кетип техиму еғир һадисиләрниң келип чиқишидин әндишә қиливатқанлар көп санлиқни игиләйдикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.