2023-Йилиниң ши җинпиң үчүн мүшкүлатқа толған бир йил болуши тәхмин қилинмақта

Хитай рәиси ши җинпиңниң һоқуқни өз қолида чиң тутуп турушни мувәппәқийәтлик һалда әмәлгә ашуралиған болсиму нөвәттә толиму мушәққәтлик бир йилға дуч келиватқанлиқи “вал ситрет журнили” гезитиниң 14-январдики обзор мақалисидә алаһидә шәрһләнди.

Чун ханвоң имзасидики обзорда ейтилишичә, аммиви сағламлиқ вә иқтисадий кризис нөвәттә ши җинпиң дуч келиватқан икки чоң мүшкүлат болуп, ши җинпиң йеқинда қолға кәлтүргән үчинчи нөвәтлик “падишаһлиқ” қа еғир сайә ташлап турған амиллардин болуп қалған. Бәзи мутәхәссисләр хитай һөкүмитиниң “вирусни нөлгә чүшүрүш” нишанидин бирдинла қайтишини өз путиға өзи палта чапқанлиқ, дәп қариған. Әнә шу хил пикирдики кишиләрниң бири профессор алфред ву (Alfred Wu) болуп бу һәқтә әһвал тонуштуруп “буниңдин қариғанда 2023-йили ши җинпиң үчүн апәтлик бир йил болуши мумкин” дегән. Униң пикричә, нөвәттә хитай компартийәси пүтүн күчини вирус вабаси кәлтүрүп чиқарған иҗтимаий вә иқтисадий җараһәтләрни давалаш, шуниңдәк хәлқ аммисиниң ишәнчини әслигә кәлтүрүшкә сәрп қиливатқан болуп, ши җинпиң һазирқи барлиқ әйибләшләргә җавабкар болуши лазим икән.

Обзорда ейтилишичә, хитай компартийәси алаһидә тәкитләп келиватқан “һәрқандақ шараитта партийә мәркизий комитетиға мутләқ садиқ болуш” һәққидики чақириқ өз нөвитидә һечкимниң ши җинпиңни тәнқидлишигә имканийәт қалдурмиған. Йәнә бир яқтин ши җинпиң бу хил тәнқидтин сақлиниш үчүн “нөвәттә биз вирусни контрол қилишниң йеңи басқучиға меңиватимиз. Бизни күтүп турған қаттиқ синақлардин оңушлуқ өтүп кетишимиз үчүн ортақ тиришишимиз лазим. Иттипақлиқ күч” дегәндәк дәбдәбилик нутуқларни сөзләп турған. Вирус юқуминиң партлаш характерлик ямриши, буниң тәсиридә тәминләш зәнҗириниң үзүлүп қелиши, мукәммәл сақлиқни сақлаш системисиниң болмаслиқи дегәндәк сәвәбләр түпәйлидин һазир истемалчилар вә ишләпчиқарғучиларниң санида охшашла чекиниш барлиққа кәлгән.

Хәлқара мунасивәтләр нуқтисидин алғанда ши җинпиңниң украина урушида русийәни астиртин қоллап-қуввәтлиши түпәйлидин хитай билән ғәрбниң мунасивити барғансери йириклишип маңған.

Хитайниң тәйвән боғузи әтрапидики һәрбий иғвагәрчиликлири ешип меңиватқан болсиму, америка һөкүмити давамлиқ түрдә тәйвәнгә һәрбий қорал-ярақ сетип беришни давам қилдуруп кәлгән. Аптор буниму хитай үчүн бир йеңи апәт болуп қеливатиду, дәп алаһидә тәкитләйду.