20 Dölet bashliqliri yighini harpisida ürümchidin Uyghur saqchilarning xangjugha ewetilgenliki ashkarilandi

Radiyomiz igiligen ehwallardin melum bolushiche da'iriler bu yil 4-,5 - séntebir künliri xitayning xangju shehiride échilish qarar qilin'ghan 20 dölet bashliqliri yighinining amanliqi üchün ürümchi shehiridin bir türküm saqchilar we dölet amanliqini qoghdash xadimlirini xangju shehirige ewetken.

Melum bolushiche, bu qétim xangjugha ewetilgen saqchi we dölet amanliqini qoghdash xadimliri terjimanliq qilish we 20 dölet bashliqliri yighini mezgilide xangjuda yüz bergen Uyghurlargha a'it mesililerni neq meydanda bir terep qilish qatarliq wezipilerde bolidighan bolup, bu yil 30- iyuldin bashlapla ürümchidiki bir qisim saqchixanilar adem ajritip, ularni xizmet sepiri namida xangjugha ewetken. Melum bolushiche, xangjugha ewetilgen saqchi xadimliri taki 20 dölet bashliqliri yighini axirlashqan'gha qeder xangjuda turup ishleydiken.

Undin bashqa bügün yene, radiyomiz xitay bölümi igiligen ehwallardin melum bolushiche, xangjuda ashpuzul -réstoranlarni ashqan Uyghurlargha yighin mezgilide ashxanilarni taqash buyruqi chüshürürülgen. Radiyomiz ziyaritini qobul qilghan sün famililik bir xitay puqrasi 23- awghust etigen bir top qoralliq saqchilarning özining öyi yénidiki Uyghur leghmenxanisigha bésip kélip, Uyghur ashxanisining ichide adem bar ‏- yoqluqini inchike tekshürgendin kéyin, ishikini taqap péchetligenlikini bildürdi. Radiyomiz ziyaritini qobul qilghan xangju puqralirining bildürüshiche, hökümet da'iriliri yene xangjuda yighin mezgilide 8 künlük dem élish élan qilip, yighin mezgilide yekke tijaretchilernimu öz ichige alghan xangju ahalisining bashqa sheherlerge bérip sayahet qilishini teshebbus qilghan.