Хитай һөкүмити уйғурлар һәққидики йеңи бир мәйдан ялғанчилиқни башлиди

Хитай һөкүмити 1-июн күни мәхсус баянат елан қилип "шинҗаңдики кишилик һоқуқниң тәрәққияти өткән бәш йилда ғайәт зор нәтиҗиләргә еришти" дәп җакарлиди.

"хитай хәвәрлири" ториниң хәвиридә ейтилишичә, шуниңдин бир күн бурун бейҗиң шәһиридә өткүзүлгән мухбирларни күтүвелиш йиғинида хитай дөләт кабинетиға қарашлиқ ахбарат ишханисиниң хадими ли шявҗүн юқириқи сөзләрни қилған. Шуниңдәк өткән бәш йилдин буян уйғурлар вә башқа милләтләрниң сиясий, иқтисад, маарип, диний етиқад вә мәдәнийәт җәһәтләрдики һәқлириниң техиму мукәммәлләшкәнликини, дөләтниң буни толуқ қоғдаватқанлиқини алаһидә тәкитлигән.

Әмма уйғур дияридики ирқиий қирғинчилиқниң бир қисми сүпитидә уйғурларниң тил-йезиқи, диний етиқади, турмуш өрп-адәтлири қатарлиқларниң мәни қилинватқанлиқии шунчә ашкара мәлум болуватқанда хитай һөкүмитиниң йәнә бу хилдики баянатларни базарға селишии бир қисим анализчиларниң әйиблишигә учриди. Америкадики мустәқил көзәткүчи илшат һәсән һәқтә пикир қилип: "хитай һөкүмити мушу хилдики ялғанларни тәкрарлавәрсәк башқиларни ишәндүргили болиду, дәп әмәлийәттә өзлирини өзлири алдаш билән мәшғул болмақта" деди.

Хитай һөкүмитиниң бу хил ялғанлириниң әң йеңиси йеқинда тарқитилиш алдида турған "шинҗаңдики чүшләр вә үмидләр" намлиқ һөҗҗәтлик филим болуп, "йәршари вақти гезити" бу филимни "уйғурларниң қанчилик бәхтияр турмуш кәчүрүватқанлиқини әң ярқин әкс әттүрүп бериду" дәп баһалиған. Хәвәрдә ейтилишичә, 53 минутлуқ бу филимда хитай һөкүмити "талланған" он нәччә шәхсни сөзлитиш арқилиқ уларниң "қайта тәрбийәләш" җәрянида қандақ йеңи билимләрни өгәнгәнлики, шу арқилиқ өзлириниң турмушини маддий вә мәниви җәһәттин қандақ йеңилиқларға пүркигәнликини баян қилидикән.

Буни бесиш арқилиқ, пикриңизни йезиң

• Принт
• Һәмбәһр
• Әвәтиш

Барлиқ пикир - баянларни көрүш.

• Бүгүнки аңлитиш
• Илгирики аңлитишлар