Béyjingda échiliwatqan 3-omumiy yighin mezgilide xitay erzdarlirining namayishi üzülmidi

9-Noyabir shenbe küni béyjingda bashlan'ghan xitayning 18-nöwetlik 3-omumiy yighini 12-noyabir seyshenbe küni ayaghlashti. Gerche da'iriler yighin mezgilide herqaysi jaylarda qattiq bixeterlik tedbirliri alghan bolsimu, emma xitay erzdarlirining béyjing, gu'angju qatarliq sheherlerde naraziliq namayishliri élip barghanliqi melum boldi.

Yighin mezgilide qattiq bixeterlik tedbirliri élin'ghan, emma 9-noyabirdin bashlap béyjing, shangxey, gu'angju qatarliq sheherlerdiki erziyet idariliri qatarliq jaylargha yighilghan erzdarlar her xil teshwiqat taxtilirini kötürüp, ünlük awazda sho'ar towlap, xitay merkizi hökümitini nöwettiki qanuniy tüzümlirini özgertishke, puqralarning haligha yétishke, emeldarlarning mal-mülkini awamgha ashkarilap, parixor emeldarlarni jazalashqa chaqirghan.

Xitay puqraliri we xelq'ara jem'iyet, bu qétim béyjingda échilghan 18-nöwetlik 3-omumiy yighinida xitayda yéngi bir islahat qedimining élinishini arzu qilghan bolsimu, emma xitay weziyitini közetküchiler, chet'el metbu'atliri we chet'ellerdiki xitay démokratliri tor béketliride öz qarashlirini otturigha qoyup, shi jinping hökümitining bu nöwetlik yighinda xelqi arzu qilghandek islahat tedbirlirini yolgha qoymighanliqini ilgiri sürüp, xitayning yéngiche islahat tedbiri almighanliqini, xitayda nöwette yürgüzülüwatqan mustebit hökümranliqning yenila dawamliship, démokratik idiyilerge qaritilghan teqib qilish téximu kücheytilishi mumkinlikini bildürmekte.