Хитай көмүр енергийиси завутлирини қисқартидиғанлиқини елан қилған

Хитайдики еғир һава булғиниши хитай ичи вә сиртида қаттиқ диққәт қозғиғанлиқтин, хитай һөкүмити буни оңшаш үчүн бир қатар тәдбирләрни елишқа башлиған.

Ройтерс агентлиқиниң бүгүн хәвәр қилишичә, хитай енергийә министирлиқи пәйшәнбә күнидики баянатида, һавадики булғинишни азайтиш үчүн бу йил тәстиқтин өткүзүп болунған бәзи көмүр енергийә завутлири қурулуш пиланлириниң вақитлиқ тохтитип қоюлғанлиқини елан қилған.

Улар шундақла, бу йил ичидә башланған қурулушларниңму тохтитип қоюлидиғанлиқини, өткән йили башлиған қурулушларниң вақтиниңму қайта бекитилидиғанлиқини ейтқан. Бирақ, баянатта буниң җәмий қанчилик қурулуш пиланини өз ичигә алидиғанлиқи һәққидики ениқ сан берилмигән.

Хәвәрдин қариғанда, буниңға асасән уйғур елиниң шималий җуңғар районидики көмүрдин електр токи ишләпчиқиридиған завут қурулуш пиланлириниңму йерими әмәлдин қалдурулидикән.

Уйғур ели хитайдики муһит булғиниши еғир җайларниң бири. Өткән йилларда уйғур ели даирилири “шинҗаңниң токини ичкиригә йәткүзүш” қурулуш пиланиға асасән қумул вә ғулҗида көмүр газидин пайдилинип електр токи ишләпчиқиридиған завутларниң көпләп қурулидиғанлиқини елан қилғанда чәтәлләрдики уйғур тәшкилатлириниң күчлүк тәнқидигә учриған иди.