Xitay amérikaliq muxbirlarni qoghlap chiqiridighanliqini élan qildi

Muxbirimiz irade
2020-03-18
Share

Xitay da'iriliri amérikaning üch chong xewer orginining xitayda turushluq muxbirlirining axbarat guwahnamisini bikar qilidighanliqini jakarlidi.

Xitay tashqi ishlar ministirliqi charshenbe künidiki bayanatida, "Wal-sitrit zhurnili", "Nyu-york waqit géziti" we "Washin'gton pochtisi" gézitide ishleydighan amérikaliq muxbirlarning bu yilning axirida etkes bolidighan xizmet kinishkilirini 10 kün ichide tapshurup bérishini telep qilghan.

Melum bolushiche, bu tedbir xitayda xizmet qiliwatqan amérikaliq muxbirlarning köpinchisige tesir körsitidiken. Chünki xitay chet'ellik muxbirlargha xizmet kinishkisini her yilda bir qétim yéngilash telipini qoyup kelgen. Qismen ehwallarda muxbirlarning alte ayda bir qétim, hetta ayda bir qétim yéngilishi telep qilin'ghan ehwallarmu bolghan iken. Xitay tashqi ishlar ministirliqi bayanatidin qarighanda, yuqiridiki bu muxbirlarning xongkong we awméndimu xizmet qilishigha yol qoyulmaydiken.

Xitay yene "Amérika awazi" we "Dewr" zhurnilinimu xitaydiki xizmetchilirige a'it uchurlarni, maliye, tijaret we öy-mülükke a'it uchurlirini tapshurushqa buyrughan.

Xitayning bu herikiti amérika bilen xitay otturisidiki ziddiyetni yenimu kücheytiwetti. Amérika dölet bixeterlik kéngishi seyshenbe küni tiwittir arqiliq tarqatqan bayanatida xitayning herikitini tenqid qildi. NSC Mundaq dep yazdi: "Xitay kompartiyesining zhurnalistlarni xitay we xongkongdin qoghlap chiqirish qarari xitay xelqini we dunyani xitay toghrisidiki heqiqiy uchurlardin mehrum qilishtiki yene bir qedem".

Halbuki xitay tashqi ishlar ministirliqi bu qararning amérikaning xitay axbaratliridin amérikadiki xizmetchi sanini qisqartishni telep qilghanliqigha qayturulghan inkasliqini ilgiri sürgen.

Ötken ay, amérika hökümiti xitayning dölet igilikidiki shinxu'a agéntliqi, xitay xelq'ara radi'osi, xitay yershari téléwiziye tori we "Xitay kündilik géziti" qatarliq 4 organni "Dölet wakaletxanisi" katégoriyesige kirgüzüp, ulardin amérikadiki 160 neper xizmetchisini 100 neperge qisqartishni telep qilghan. Emma amérika terep bu tedbirni xitay hökümiti amérikaning 3 neper muxbirini xitaydin qoghlap chiqiriwetkendin kéyin élan qilghanidi.

Amérika tashqi ishlar ministiri mayk pompéyo bolsa xitayning yuqiridiki bu herikitini qattiq eyiblep, "Xitayning yuqiridiki 4 orginining musteqil axbarat orgini emes, belki xitay hökümitining teshwiqat apparatliri ikenliki hemmige ayan, béyjing hökümiti bu arqiliq dunyaning xitayda boluwatqanlardin xewerdar bolushining aldini almaqchi" dégen.

"Wal-sitrit zhurnili", "Nyu-york waqit géziti" we "Washin'gton pochtisi" qatarliq organlarmu bügün 18-mart resmiy bayanat élan qilip, özlirining xitay hökümitining bu qararidin qattiq epsuslan'ghanliqini ipade qildi we buni pikir-axbarat erkinlikige qilin'ghan éghir tehdit, dep körsetti.

Xelq'araliq muxbirlarni qoghdash komitétimu 18-mart küni bayanat élan qilip, xitay hökümitini bu qararidin derhal waz kéchishke chaqirdi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet