Фирансуз мухбир уйғурлар һәққидики мақалиси сәвәблик хитайдин чиқириветилиши мумкинликини билдүрди

Мухбиримиз ирадә
2015-12-22

Фирансийәлик мухбир урсула готийер ханим "ню-йорк вақти" гезитигә сөз қилип, өзиниң уйғурлар һәққидә язған мақалиси сәвәблик хитайдин чиқириветилиш еһтималлиқи барлиқини билдүргән. У 22-декабир күнидики сөзидә, хитайдики мухбирлиқ кинишкисиниң һазирғичә йеңиланмиғанлиқини, әгәр бу давам қилған тәқдирдә, өзиниң 1-январдин бурун хитайдин чиқип кетишкә мәҗбур болидиғанлиқини билдүргән.

Урсула готийир фирансийәдә нәшрдин чиқидиған "лобис" намлиқ хәвәр журнилиниң бейҗиңда турушлуқ мухбири. У мәзкур журналда хитай һөкүмитиниң уйғур елидики "террорлуққа қарши уруши" ға қарита бәзи гуманий қарашлирини ипадилигәндин кейин, хитай һөкүмитиниң нишаниға айлинип қалған иди. У һәтта хитай ташқи ишлар министирлиқи тәрипидин чақиртилип, "хата хәвәр бәргәнликини етирап қилиш" қа мәҗбурланған.

Урсула ханим өзиниң "хитайниң париж һуҗумидин кейинки һәмкарлиқ чақириқи йошурун мәқсәткә игә" мавзулуқ мақалисидә, париждики террор һуҗумидин кейин ши җинпиңниң дәрһал фирансийә билән террорлуққа қарши ортақ күрәш қилидиғанлиқини җакарлиғанлиқини, әмма буниң мәқсәтлик икәнликини әскәртиш билән биргә, байдики көмүр канда йүз бәргән вәқәниң әслидә йәрлик уйғурларниң зулумға чидимай әп барған наразилиқ һәрикити икәнликини, уни хәлқара җиһад һәрикитигә бағлайдиған күчлүк испат йоқлуқини баян қилған.

Урсуланиң "ню-йорк вақти" гезитигә ейтишичә, адәттә хитайда хизмәт қилидиған чәтәллик мухбирларниң рухсәт кинишкиси һәр йили 11-айдин 12-айниң бешиғичә болған арилиқта йеңилинип болидикән. Әмма у һазирғичә хитай ташқи ишлар министирлиқидин хәт тапшурувалмиған. Униң бу мәсилиси билән алақидар болуватқан фирансуз дипломатлардинму җаваб кәлмигән.

Чеграсиз мухбирлар тәшкилати вә хитайда турушлуқ чәтәллик мухбирлар кулуби әйни чағда елан қилған баянатида, хитай һөкүмитини "мухбирларға тәһдит қилип, пикир әркинликини чәкләш" билән әйиблигән иди.