Wuxende bayqalghan sars tipidiki gumanliq öpke yallughi wirusi pütün xitaygha tarqalmaqta

Xitayning wuxen shehiride bayqalghan sars tipidiki gumanliq öpke yallughi wirusining téz sür'ette pütün xitaygha tarqiliwatqanliqi ilgiri sürüldi.

Xitay sehiye we salametlik ministirliqining ashkarilishiche, yéqinqi ikki kün ichide wuxen shehirining özidila 136 yéngi késellik bayqalghan. Xewerlerde bir kishining ölgenliki, buning bilen bu wirusta ölgenler wuxenning özidila 3 ke yetkenlikini bildürmekte. Melum bolushiche, ularning ikkisi ötken yili dékabirda ölgen. Sehiye we salametlik komitéti 20‏-yanwar küni élan qilghan uchurida nöwette wuxen shehiride jem'iy 198 kishi bu wirustin yuqumlan'ghanliqi, ulardin 170 kishining doxturxanida ikenlikini bildürgen.

BBC Ning 18‏-yanwar küni bergen xewiride mutexessislerning bu wirustin yuqumlan'ghanlar 1700 ge yétip barghanliqini perez qiliwatqanliqi ilgiri sürülgen idi. Melum bolushiche, nöwette bu xil wirus béyjing, gu'angdung qatarliq jaylirida bayqalghan. Uning gu'angdungda bayqilishi jem'iyette qattiq patiparaqchiliq peyda qilghan.

2003‏-Yili tarqalghan sars késili del gu'angdungdin bashlan'ghan idi. Xewerlerde qeyt qilinishiche, gu'angdungdiki bezi doxturxanilar ishchi-xizmetchilirining dem élishini bikar qilghan. Hazirgha qeder mezkur wirusning Uyghur diyarida bayqalghanliqigha da'ir héchqandaq melumat yoq. Peqet bezi xitay hökümet taratqulirining 20‏-yanwar künidiki xewerliride xitay yéza-igilik ministirliqining manas nahiyesidiki lenjowen yézisining tebi'iy qoghdash rayonidiki yawa aqqularda qush zukami bayqalghanliqini élan qilghanliqigha da'ir uchurlar bérilgen.

Bezi közetküchilerning ilgiri sürüshiche, xitay hökümiti mezkur rayonda wirus bayqalghan teqdirdimu, uni yoshurushqa tirishidiken. Chünki u wirus seweblik xelq'ara jem'iyetning diqqiti 3 milyondek Uyghur lagérlargha qamalghan bu rayon'gha téximu merkezliship qélishini xalimaydiken.