Хитай даирилири уйғур навайчилиқини хитайни нан билән тәминләш мәнбәсигә айландурушниң пейиға чүшкән

Мухбиримиз әркин
2021-12-21
Share

2017-Йили чоң тутқундин башлап уйғур навайлирини “нан ишләпчиқириш бағчиси” дегән намдики хитай ширкәтлириниң чоң типлиқ навайчилиқ карханилириға йиғивалған хитай даирлири, уйғур навайчилиқини хитай базирини нан билән тәминләш мәнбәсигә айландурушниң пейиға чүшкән. Хитай таратқулириниң ашкарилишичә, нөвәттә қәшқәрниң ‍өзидила вилайәт дәриҗилик икки “нан ишләпчиқириш базиси”, наһийә, шәһәр дәриҗилик 14 “нан ишләпчиқириш бағчиси” қурулған.

Кишилик һоқуқ тәшкилатлириниң ейтишичә, 2017-йили башланған чоң тутқунда райондики бурун әркин навайчилиқ қилидиған мустәқил касиплар “кәспий маһарәт өгитиш” намида йиғивелип, уйғур елиниң һәр қайси җайлиридики бу хил “нан ишләпчиқириш базилири” да мәҗбурий әмгәккә селинмақтикән. Кишилик һоқуқ тәшкилатлири хитайниң бу арқилиқ уйғурларниң мәзкур мустәқил һүнәр кәспини вәйран қилғанлиқини билдүрмәктә. “шинҗаң” гезитиниң ашкарилишичә, нөвәттә қәшқәр вилайитидики “нан ишләпчиқириш бағчиси” намидики бу хил нан базилирида 50 миң 100 адәм ишләйдикән.

“шинҗаң” гезитиниң 21-декабир күнидики хәвиридә, бу нан базилириниң техиму көп хитай ширкәтлириниң диққитини қозғаватқанлиқи, йеқинда гуаңши люҗовдики бир қулулә талқени ширкитиниң алайитән қәшқәргә келип, қәшқәр иқтисади ечиветиш районидики бир “нан ишләпчиқириш базиси” билән нан билән қулулә талқенини қандақ бирләштүрүш, уйғур нанлириниң сақлиниш вақтини қандақ узартиш тоғрисида һәмкарлиқ тохтами имзалиғанлиқини билдүргән. Хәвәрдә ейтилишичә, нөвәттә қәшқәрдики “нан ишләпчиқириш базилири” да 13320 тонур бар болуп, бу нан базилирини 55 ширкәт контрол қилидикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт