Xitay da'iriliri Uyghur nawaychiliqini xitayni nan bilen teminlesh menbesige aylandurushning péyigha chüshken

Muxbirimiz erkin
2021-12-21
Share

2017-Yili chong tutqundin bashlap Uyghur nawaylirini “Nan ishlepchiqirish baghchisi” dégen namdiki xitay shirketlirining chong tipliq nawaychiliq karxanilirigha yighiwalghan xitay da'irliri, Uyghur nawaychiliqini xitay bazirini nan bilen teminlesh menbesige aylandurushning péyigha chüshken. Xitay taratqulirining ashkarilishiche, nöwette qeshqerning ‍özidila wilayet derijilik ikki “Nan ishlepchiqirish bazisi”, nahiye, sheher derijilik 14 “Nan ishlepchiqirish baghchisi” qurulghan.

Kishilik hoquq teshkilatlirining éytishiche, 2017-yili bashlan'ghan chong tutqunda rayondiki burun erkin nawaychiliq qilidighan musteqil kasiplar “Kespiy maharet ögitish” namida yighiwélip, Uyghur élining her qaysi jayliridiki bu xil “Nan ishlepchiqirish baziliri” da mejburiy emgekke sélinmaqtiken. Kishilik hoquq teshkilatliri xitayning bu arqiliq Uyghurlarning mezkur musteqil hüner kespini weyran qilghanliqini bildürmekte. “Shinjang” gézitining ashkarilishiche, nöwette qeshqer wilayitidiki “Nan ishlepchiqirish baghchisi” namidiki bu xil nan bazilirida 50 ming 100 adem ishleydiken.

“Shinjang” gézitining 21-dékabir künidiki xewiride, bu nan bazilirining téximu köp xitay shirketlirining diqqitini qozghawatqanliqi, yéqinda gu'angshi lyujowdiki bir qulule talqéni shirkitining alayiten qeshqerge kélip, qeshqer iqtisadi échiwétish rayonidiki bir “Nan ishlepchiqirish bazisi” bilen nan bilen qulule talqénini qandaq birleshtürüsh, Uyghur nanlirining saqlinish waqtini qandaq uzartish toghrisida hemkarliq toxtami imzalighanliqini bildürgen. Xewerde éytilishiche, nöwette qeshqerdiki “Nan ishlepchiqirish baziliri” da 13320 tonur bar bolup, bu nan bazilirini 55 shirket kontrol qilidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet