Хитайға тақабил турушта америка вә японийә сода дипломатийәсини йолға қоймақчи

Хитайниң барғансери ешип бериватқан тәһдитлиригә тақабил туруш үчүн америка билән японийә оттурисидики һәмкарлиқниң бундин кейин сода дипломатийәси шәклидә давам қилидиғанлиқи мәлум болмақта.

Ройтерс агентлиқиниң 1-авғусттики хәвиридә ейтилишичә, өзәк (chip), батарейә вә енергийә нөвәттә америка билән японийә оттурисидики йеңи һәмкарлиқниң әң түп темилири болуп, бу җәһәттики тәминләш зәнҗиридә хитайға тайинип қалмаслиқ яки бу хил тайинип қелишни әң төвән дәриҗигә чүшүрүш буниңдики ахирқи мәқсәт икән. 29-Июл күни икки тәрәп имзалиған қошма баянатта бу мәсилә алаһидә орун алған.

Америка қошма штатлириниң японийәгә әвәтилгән баш әлчиси рам еманюл (Rahm Emanuel) 2022-йилиниң бешида вәзипигә олтурғандин буян мушу хил “сода дипломатийәси” ни тәкитләп келиватқан болуп, буниң иқтисадий бихәтәрлик үчүн муһимлиқини көп қетим оттуриға қойған. Нәтиҗидә йеқинда америка ширкәтлири кәлгүсидики өзәк ишләпчиқириш завутлирини японийәгә қурушқа тәйярлиқ көрмәктикән. Бу һәқтә сөз болғанда баш әлчи рам “сода дипломатийәси америка билән японийә оттурисидики иқтисадий һәмкарлиқни вә маслишишни әмәлгә ашуруштики муһим қәдәм” дегән. Буниңға җавабән “тесла” (Tesla) ширкитини батарейә билән тәминләшни үстигә алған “панасоник” (Panasonic) ширкити йеңи батарейә завутини канзас штатиға қуруш һәққидә қарар алған.

Мәлум болушичә бу хилдики иқтисадий һәмкарлиқ хитайниң иқтисадий қуввитини дәстәк қилип сиясий җәһәттики үстүнлүкни қолға кәлтүрүшни көзләватқан зомигәрликигә қақшатқуч зәрбә болидикән.