Xitaylarni élip mangghan pakistan herbiy aptomobili qoralliq hujumgha uchrighan

Pakistanning xitay inzhénérlirini élip mangghan bir herbiy aptomobil etriti 13-awghust yekshenbe küni pakistanning gherbiy jenubidiki istratégiyelik gwadar porti etrapida qoralliq hujumgha uchrighan. Taratqularning bildürüshiche, qoralliqlarning hujumigha uchrighan aptomobildiki kishiler pakistan armiyesining qoghdishida karachidin gwadargha kétiwatqan xitay inzhénérliri iken. Xewerlerde, pakistan armiyesining 23 neper xitay qurulush inzhénérini oq ötmes aptomobil bilen qoghdap kétiwatqanda hujumgha uchrighanliqi bildürülmekte. Pakistan saqchi da'iriliri pakistan armiyesi bilen bolghan toqunushta ikki qoralliqning étip öltürülgenlikini éytqan.

Gwadar porti qurulushi xitay 60 milyard dollar meblegh sélishni pilanlighan “Xitay-pakistan iqtisadi karidori” ning bir parchisi bolup, bu qurulush Uyghurlarning qeshqer bilen belujistanning gwadar portini öz ara tutashturushni, Uyghur rayonidin pakistan arqiliq déngizgha chiqishni nishan qilghan istratégiyelik qurulushlirining biridur.

Lékin bu qurulush belujistandiki yerlik xelq-belujilarning qoralliq qarshiliqigha uchrap kelgen. Roytérs agéntliqining éytishiche, bu hujumgha belujistan azadliq armiyesi mes'ul ikenlikini élan qilghan. Özini “Belujistan azadliq armiyesi” dep atighan teshkilat bu heqtiki bayanatida, hujumda köp qétimliq yarilinishlarning bolghanliqini ilgiri sürgen. “Bügünki hindistan” géziti, hujumda töt xitayning öltürülgenlikini qeyt qilghan bolsimu, lékin xitayning pakistanda turushluq elchixanisi, hujumda xitay puqralirining chiqim bolmighanliqini éytqan. Xitay tashqi ishlar ministirliqi bayanatchisi wang wénbin bolsa xitayning “Pakistan bilen dawamliq térrorluqning tehditining aldini alidighanliqi we uninggha taqabil turidighanliqi” , “Pakistandiki xitay xadimliri, organliri we qurulush türlirining bixeterlikini ünümlük qoghdaydighanliqi” ni bildürgen. Uning éytishiche, “Xitay-pakistan dostluqigha we xitay-pakistan iqtisadiy karidori (CPEC) qurulushigha buzghunchiliq qilidighan herqandaq urunush hergiz muweppeqiyet qazinalmaydiken” .

Pakistan b d t, islam hemkarliq teshkilati qatarliq xelq'ara sorunlarda xitayni qollap, uning Uyghurlargha irqiy qirghinchiliq qilghanliqini ret qilip kéliwatqan dölet idi.