Аталмиш “шинҗаң вәкиллири” хитайниң “бөлгүнчиликкә қарши туруш қануни” вә “өлчәмлик тил (путуңхуа) қануни” ға түзитиш киргүзүш тәклипи бәргән

Мухбиримиз ирадә
2022-03-10
Share

13-Нөвәтлик хитай мәмликәтлик хәлқ қурултийи вә сиясий кеңәш йиғини бейҗиңда ечиливатқан мәзгилдә, хитай даирилири аталмиш “шинҗаң вәкиллири” ичидики уйғур “хәлқ қурултийи вәкиллири” ниң еғизи арқилиқ өзиниң бирқанчә сәзгүр “қанун” лириға түзитиш киргүзүш тәклипини оттуриға чиқарған.

Хитайниң “тәңритағ тори” да тарқитилған хәвәрдә көрситилишичә, хитайниң мәмликәтлик хәлқ қурултийиниң 5-йиғиниға қатнишиватқан “шинҗаң вәкилләр өмики” дики вәкилләр қурултайға 8 тәклип лайиһәси вә 148 пикир сунған. Улар сунған тәклип лайиһәлири ичидә хитайниң “бөлгүнчиликкә қарши туруш қануни” ға түзитиш киргүзүш тоғрисидики тәклип; “җуңхуа хәлқ җумһурийитиниң өлчәмлик тил (путуңхуа) қануни” ға түзитиш киргүзүш тоғрисидики тәклип; “җуңхуа хәлқ җумһурийитиниң вәтәнпәрвәрлик қануни” бекитиш тоғрисидики тәклип лайиһәси қатарлиқлар чәт әлләрдики уйғур көзәткүчиләрниң диққитини қозғиди.

“тәңритағ тори” ниң хәвиридә ейтилишичә, юқириқи “җуңхуа хәлқ җумһурийитиниң өлчәмлик тили қануни” ға түзитиш киргүзүш тоғрисидики тәклипни тунҗи болуп ақсу учтурпан наһийәси имамлирим базирида “дөләт тили мәктипи” йәни, хитай тили вә мәдәнийити мәктипини қуруп хитай һөкүмитиниң алқишиға еришкән қурбан нияз қатарлиқ вәкилләр оттуриға қойған икән. У тәклипидә “‛җуңхуа хәлқ җумһурийитиниң өлчәмлик сөзләш вә йезиқ тили қануни‚ 20 йилдин көпрәк вақит йолға қоюлди, қанунни дәвр билән тәң өзгәртиш керәк. Дөләтниң ортақ тил қануниниң йетәкчи идийәсини айдиңлаштуруп, пуқраларниң өгиниш вә ишлитиш җәһәттики һоқуқи вә мәҗбурийитиниң бирдәкликидә чиң туруш керәк,” дегән.

Хәвәрдә “бөлгүнчиликкә қарши туруш қануни” ға түзитиш киргүзүш тоғрисидики тәклип; “җуңхуа хәлқ җумһурийитиниң өлчәмлик тили қануни” ға түзитиш киргүзүш тәклиплириниң тәпсилати һәққидә ениқ мәлумат берилмигән. Чәтәлләрдики уйғур көзәткүчиләр буниң уйғурларни терорлуққа бағлап җазалаш, мутләқ қамални күчәйтиш вә уни қануний асасқа игә қилиш, уйғур ана тилини йоқитип аталмиш “дөләт тили” намидики хитайчини йәниму кәң омумлаштуруш билән зич бағлинишлиқ икәнликини мөлчәрлимәктә.

Хитай даирилири нөвәттә уйғурларни йоқитиш мәқсәт қилинған һәр хил сиясәтлирини бейҗиңдики икки қурултайға қатнишиватқан аталмиш “уйғур вәкил” ләрниң еғизи билән оттуриға қоюватқанлиқи мәлум. Алдинқи күни мәмликәтлик сиясий кеңәш 13-нөвәтлик 5-йиғинида хитай мәмликәтлик сиясий кеңәш әзаси, уссулчи дилнар абдулланиң еғизи билән аталмиш “шинҗаңни мәдәнийәт арқилиқ озуқландуруш” қурулушини чоңқур йолға қоюш, “җуңхуа миллити ортақ гәвдиси еңи” ни мустәһкәмләш қатарлиқ тәклип лайиһәлирини елан қилған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт