Уйғур районидики йәслидә уйғур балилирини хитайлаштурушниң һәр хил усуллири синақ қилинмақтикән

Уйғур пәрзәнтлирини ата-анисидин яки аиливи тәрбийә муһитидин айриветип, уларни кимлик еңидин вә етиқад туйғусидин мәһрум қалдуруш нөвәттә уйғур районидики көплигән йәсли вә мәктәпләрниң асаслиқ нишани болмақта икән.

3-Май күни “шинхуа тори” да елан қилинған бир видийода, нигарә исимлик бир йәсли оқутқучисиниң йәслидики балиларға қатнаш қаидилирини тәқлидий оюнлар билән өгәткәнлики тәшвиқ қилинған болуп, видийодики көрүнүшләрдин йәсли балилириниң күндилик турмушидики қоюқ хитайчә алаһидилик көзгә челиқиду.

Қомул шәһәрлик 11-йәслидә елинған бу видийода йәслидә арилишип оқуватқан уйғур пәрзәнтлири билән хитай балилириниң йетип-қопуш, йәп-ичиш вә ойнашта биллә икәнлики, өз ара параңлириниң тамамән хитайчә икәнлики, бир-биригә ярдәмлишип, иҗил-инақ яшайдиғанлиқи алаһидә көрситилгән.

Тәтқиқатчи адриян зениз уйғур ирқий қирғинчилиқиниң көп тәрәплимилик алаһидилики һәққидә тохталғанда, кәң-көләмлик, системилиқ елип бериливатқан мәдәнийәт қирғинчилиқини тилға алған болуп, чен чүәнго оттуриға қойған “уйғурларни йилтизидин айриветиш” дегини әмәлийәттә уйғур пәрзәнтлирини ата-анисидин, аиливи муһитидин айриветип, уларни хитай еңи бойичә тәрбийәләш икән вә буниң тунҗи қәдими йәслидин башлинидикән.