Xitayning ottura asiyagha kirishi rusiyege bésim peyda qilidu

Nöwette, ottura asiya döletliri bilen xitay arisidiki soda-iqtisadiy hemkarliqlar xitayning “Bir belwagh, bir yol” pilani ramkisi astida élip bérilishqa kirishken bolup, xitayning 2018-yili ottura asiya döletlirige téximu zor meblegh sélishi perez qilinmaqta. Yéqinda 10 yildin buyan söz témisi bolup kéliwatqan xitay-qirghizistan-özbékistan tömür yoli qurulushini ishqa ashurush heqqide özbékistan paytexti tashkentte pikir birliki hasil qilinishi rusiye analizchilirining diqqitini qozghighan.

Amérika awazining bu heqtiki xewer analizida körsitilishiche, xitayning “Bir belwagh bir yol” pilanini ishqa ashurush üchün qirghizistan, özbékistan, qazaqistan qatarliq ottura asiya döletliri bilen zor miqdardiki kélishimlerni imzalishi we ottura asiya döletlirining énérgiye menbelirining xitay teripidin igilinishi, eksiche ottura asiya döletlirining rusiye bilen bolghan soda-iqtisadi alaqilirining töwenlishi rusiyege nisbeten bésim peyda qilmaqta iken.

Maqalide körsitilishiche, xitayning soda-iqtisadi jehettin ottura asiya döletlirini özige baghlishidin bashqa yene bu döletlerde kungzi institutlirini échishi, zor sandiki ottura asiyaliq oqughuchilarning xitay meblighi bilen xitayda oqup terbiyilinishi we bashqa xitay tesirlirining tiklinishi rusiyening ottura asiyadiki en'eniwi tesirige zerbe hésablan'ghan. Biraq, bezi rusiye mutexessisliri xitayning ottura asiyagha qanche köp meblegh salghanséri, shunche éghir patqaqqa patidighanliqi, ottura asiyaliqlarda hazir yene milletchilikning küchiyip, uning xitayghimu qaritiliwatqanliqi, xitay tehditi qarishi éship, ularda xitaygha taqabil turush we buning üchün rusiyege tayinish idiyesiningmu küchiyidighanliqini otturigha qoyghan.