Ürümchi shehirining sabiq bashliqi yasin sidiq tutqun qilin'ghan

Xitay hökümiti yene bir yoqiri derijilik Uyghur emeldarni tutqun qilghan. Xitayning merkizi intizam tekshürüsh komitéti we dölet riwiziye komitéti 6-april küni élan qilghan uqturushida, ürümchi shehirining sabiq sheher bashliqi, Uyghur aptonom rayonluq xelq hökümiti partiye guruppisining bash katipi we sékritari yasin sidiqning tutup turup tekshürüliwatqanliqini élan qilghan.

Uqturushta yasin sidiqning “Partiye intizami we qanun'gha éghir derijide xilapliq qilish” gumani bilen tekshürüliwatqanliqi bildürülgen.

Mezkur komitétning tor béـtidiki uqturushtin qarighanda, yasin sidiq ilgiri aratürk nahiyesining hakimi we mu'awin partkom sékritari, qumul wilayetlik partkomning da'imiy hey'iti we qomul wilayitining mu'awin waliysi, qeshqer wilayetlik partkomning mu'awin sékritari, intizam tekshürüsh komitétining sékritari, Uyghur aptonom rayonluq xelq qurultiyi da'imiy komitéti qeshqer wilayetlik xizmet komitétining mudiri qatarliq wezipilerni ötigen.

U 2017-yili 11-ayda ürümchi sheherlik partkomning mu'awin sékritari qilip yötkep kélin'gendin kéyin, 2018-yil 1-aydin bashlap ürümchi shehirining bashliqi bolup wezipe ötigen, kéyin yene Uyghur aptonom rayonluq xelq hökümiti partiye guruppisining bash katipi we sékritarliqigha östürülgen.

Yasin sidiq xitay hökümiti Uyghur élida lagérlarni yolgha qoyup, keng kölemde adem tutuwatqan we hemde Uyghurlarni xitaylashturush siyasitini qattiq kücheytken bir mezgilde “Uyghurlar türklerning ewladi emes” dégen bayanat xaraktérliq maqalisini élan qilghan idi.

U 2018-yili 8-ayda “Ürümchi kechlik géziti” de élan qilghan shu maqaliside “Shinjangdiki milletler jungxu'a milliti bilen qandashliq munasiwitige ige, ‛üch xil küch‚ler tarixni burmilap, Uyghurlarni türklerning ewladi, türkler bilen Uyghurlar qérindash dégenni teshwiq qildi. Qedimdin tartip Uyghurlar jungxu'a milliti qandashliq a'ilisining bir qismi bolup keldi” dep yazghan. Uning bu sözlirige chet ellerdiki tarixchilar küchlük inkas qayturghan idi.

Xitay hökümitining siyasetlirige yarisha sadaqitini namayen qilishqa tirishqan yasin sidiqningmu xitay hökümiti teripidin tutqun qilinishi, xitay üchün xizmet qiliwatqan herqandaq Uyghur emeldarlirining axiriqi teqdirining haman xitayning changgilida bolidighanliqini körsitip bermekte.