Явропа иттипақи хитайни агаһландурди

Явропа иттипақиниң иҗраат оргини-явропа комиссийиси хитайға дипломатик агаһландуруш берип, һәр қандақ дөләтниң җәнубий деңизда әркин қатниши керәкликини билдүрди. явропа комиссийиси хитайниң исмини ашкара тилға алмиған болсиму, әмма у җәнубий деңизниң “мәвҗут һалитини өзгәртип, вәзийәтни җиддийләштүрүшкә қарши туридиғанлиқи” ни билдүргән.

Бу явропа комиссийисиниң җәнубий деңиз мәсилисидә хитайға тунҗи қетим дипломатик агаһландуруш бериши. У бу дипломатик агаһландурушни чаршәнбә күни елан қилған “явропа иттипақиниң хитайға қарита йеңи истратегийә низами” намлиқ һөҗҗитидә оттуриға қойди.

Һөҗҗәттә мундақ дейилгән: “явропа иттипақи җәнубий деңиз вә униң һава тәвәликидә әркин қатнаш вә учушниң қоғдилишини үмид қилиду.” явропа комиссийисиниң мәзкур һөҗҗитидә явропа иттипақиниң кәлгүси 5 йиллиқ хитай сиясити оттуриға қоюлған. Бирақ мәзкур һөҗҗәтни явропа иттипақиға әза 28 дөләт мақуллиши керәк.

Явропа иттипақи илгири җәнубий деңиз мәсилисидә битәрәпликни сақлайдиғанлиқини тәкитләп кәлгән. Әмма америка явропа иттипақини хитайниң җәнубий деңиздики игилик һоқуқ тәлипигә қарши турушқа үндәп келиватқан иди.

Хитай җәнубий деңизниң асасән барлиқ қисмида игилик һоқуқи барлиқини елан қилип, әтраптики вийетнам, филиппин, һиндонезийә қатарлиқ дөләтләрниң наразилиқини қозғиған.