Xitay Uyghur rayonida yüz bergen yer tewreshke da'ir uchurlarni qattiq qamal qilmaqta

Xitay hökümitining Uyghur rayonida yüz bergen 7.1 Bal éghir yer tewresh we uning netijiside kélip chiqqan ölüm we yarilinish ehwalliri heqqidiki uchurlarni qattiq qamal qiliwatqanliqi bilinmekte.

Xitay hökümet taratqulirining xewerlirige qarighanda, 1-ayning 23-küni seher sa'et 2 din sel ötkende aqsuning uchturpan nahiyeside 7.1 Bal yer tewrigen bolup, yer tewresh chongqurluqi 22 kilométirgha yetken. Seher sa'et 4 kiche dawamlashqan 3 baldin yuqiri qalduq yer tewreshler 70 qétimdin éship ketken bolup, aqsu shehiri, aral, kucha, qeshqer, yeken, xoten qatarliq jaylardimu uning tesiri körülgen.

Bu yer tewresh heqqide eng deslepte gérmaniye yer shari ilim-pen tetqiqat merkizi 23-yanwar küni shu jay waqti yérim kéche sa'et 12 de aqsu wilayitige yéqin jayda 7.1 Bal yer tewrigenliki heqqide uchur bergenidi.

Xitay taratquliri uchturpan nahiyeside yer tewresh eng éghir bolghan jayning yamansu qirghiz yézisi ikenlikini éytqan bolsimu, bu yézida apetning zadi qanchilik éghir bolghanliqi heqqide uchur bermigen, peqet apet yüz bergendin kéyin shinjang herbiy rayoni, qoralliq qisim bash etritidin 630 din köp eskerning apettin qutquzushqa atlan'ghanliqini, uchturpan nahiyesidiki her qaysi idare-organlar, aqsu wilayiti we aptonom rayondin yardemge kelgenlerning yamansu yézisigha qarap mangghanliqini xewer qilghan.

Xitayning “Shinjang géziti” tori, “Tengritagh tori” 23-yanwar küni chiqarghan xewerge qarighanda, aqsuning uchturpan nahiyeside 7.1 Bal yer tewrep éghir apet yüz bergendin kéyin, Uyghur aptonom rayonluq partkomning sékrétari ma shingruy, Uyghur aptonom rayonining re'isi erkin tuniyaz qatarliqlar munasiwetlik idare-orunlarning kattabashlirini élip, “Apetning birinchi sépide xizmet qilish” qa mangghan.

Ma shingruy bilen erkin tuniyazning yer tewresh nuqtisigha bérishi, uchturpan nahiye yamansu yézisida yüz bergen yer tewreshning nahayiti éghir bolghanliqi heqqidiki texmin we endishilerni peyda qilmaqta. Nöwette xitay hökümet taratquliri bu qétimliq yer tewreshte peqet 6 kishining yarilan'ghanliqini xewer qilghan bolup, shunche qattiq yer tewreshte zadi qanchilik ademning ölgenliki, yarilan'ghanliqi we qanchilik emeliy ziyanning körülgenliki heqqidiki uchurlarni qattiq qamal qilmaqta iken.