Уйғур районидики юқири сүрәтлик ташйолниң 3-линийәсидә қатнаш башланған

“хитай хәвәрлири тори” ниң 31-авғуст күнидики хәвиригә қариғанда, уйғур райониға кирип-чиқидиған юқири сүрәтлик ташйолниң 3-линийәси болған йетимбулақ-чақилиқ юқири сүрәтлик ташйолида 30-авғуст күни қатнаш башланған. Буниң билән, уйғур районидики юқири сүрәтлик ташйолниң омумий узунлуқи 7500 километирдин ешип кәткән.

Йетимбулақ-чақилиқ юқири сүрәтлик ташйоли уйғур райониниң шәрқий җәнубидики муһим қатнаш йоллиридин биригә айланған болуп, җәнубта чиңхәй билән чегралинидиған чақилиқ наһийәсиниң йетимбулақ (яки чиланбулақ) базиридин башлинип, шималда чақилиқ наһийә базириға тутишидикән. Бу йол лйәнйүнгаң-қорғас юқири сүрәтлик ташйоли, бейҗиң-үрүмчи юқири сүрәтлик ташйолидин қалса, уйғур райониға кирип-чиқидиған 3-юқири сүрәтлик ташйол линийәси һесаблинидикән.

Хәвәрдә ейтилишичә, хитай һөкүмити узунлуқи 294 километир келидиған бу йолни ясаш үчүн 14 милярд 409 милйон йүән сәрп қилған болуп, бу йолда қатнаш башланғандин кейин ичкири хитайдин келидиған машинилар биваситә чәрчән, чақилиқ, хотән, қәшқәргә кирәләйдикән.

Хитай һөкүмити “шинҗаңға кирип-чиқишни тезләштүрүш, шинҗаңниң ички йолини туташтуруш, җәнуб-шимал оттурисини раванлаштуруш, чеградин кирип-чиқишни бағлаштуруш” қурулушиға көпләп мәбләғ селиватқан болуп, бу районни “бир бәлвағ бир йол” линийәсидики муһим иқтисад түгүнигә айландуруш вә бу районға ичкиридин көпләп адәм вә мәбләғ киргүзүш шараитини һазирлимақчи болған. Әмма хитайниң иқтисади чекиниватқан, юқум вәзийити еғирлишиватқан әһвалда хитайниң у пиланни ишқа ашуралмаслиқ еһтималиму күчәймәктикән. Вашингтон шәһиридики “туташ асия” ақиллар мәркизиниң тәтқиқатчиси хилман бу һәқтә сөз қилип: “мениңчә, ‛бир бәлвағ бир йол‚ қурулуши деңизда өлүп қалмаслиқи мумкин. Әмма униң қуруқлуқта нәгә баралиши бәкму гуманлиқ” дегән.