Мәкиттә «14‏-аһалиләр райони» намида мәхсус лагердин чиққанлар үчүн аилиликләр лагери қурулған

Мухбиримиз шөһрәт һошур
2020-08-04
Елхәт
Пикир
Share
Принт
Турпанға селинған мәлум «қайта тәрбийәләш мәркизи».
Турпанға селинған мәлум «қайта тәрбийәләш мәркизи».
Social Media

Вәзийәттин хәвәрдар кишиләрдин бири мәкит наһийәсидә лагердин қоюп берилгәнләр үчүн мәхсус бир аилиликләр қоруси селинғанлиқи, 7000 дин артуқ аилә сиғидиған бу қоруға кирип-чиқишниң чәкләнгәнликини паш қилған иди. Мухбиримизниң ениқлашлири давамида мәкитниң түмәнтал йезисидин лагерға әкетилгән исмаил давутниң лагердики аталмиш өгинишини түгәткәндин кейин, «14-аһалиләр райони» дәп нам берилгән лагердин чиққанлар лагериға орунлаштурулған. Мәлум болушичә, бу лагерниң нормал лагердин пәрқи тутқунларниң пәқәт аилиси билән бирликтә яшаш имканиға игә болушидур.

Вәзийәттин хәвәрдар кишиләрдин бири радийомизға инкас йоллап, мәкит наһийисидә лагердин чиққанлар үчүн мәхсус лагер қурулғанлиқи, бу җайдиму илгирики лагерда давам қилған сиясий өгиниш, өзини тәкшүрүш, мәсилә тапшурушларниң давам қилидиғанлиқи ; пәқәт бу лагерда тутқунларниң аилиси билән биллә яшайдиғанлиқини мәлум қилғаниди. Инкаста йәнә бу қоруда йүзләрчә аилиликләр бинаси барлиқи, бу қоруға кирип-чиқишниң чәкләнгәнлики әскәртилгәниди. Бу һәқтә елип барған ениқлашлиримиз давамида, мәкит наһийәсидики алақидар органлар бу темида гәп қилиштин өзлирини тартти. Мәкитниң түмәнтал йезисидин телефонимизни қобул қилған бир кәнт сақчиси, бу кәнттә мәкиттики шу лагердин чиққанлар аилиликләр лагерида исмаил давут исимлик бир киши барлиқини ашкарилиди. Униң дейишичә, исмаил давут лагердин чиққандин кейин түмәнталдики өйигә әмәс, мәкит наһийә базиридики мәзкур қоруниң ичигә орунлаштурулған; нөвәттә у әнә шу қоруниң ичидә аял-балилири билән биллә яшайдикән; әмма түмәнталдики ата-аниси вә уруқ-туғқанлири билән көрүшүш үчүн мәхсус қорудин чиқиш рухсәтнамиси елиши керәк икән. Бу қоруниң «14-аһалиләр райони» дәп атилидиғанлиқини тилға алған бу сақчи хадимниң дейишичә, бу қоруда йүзләрчә аилиликләр бинаси мәвҗут икән.

Телефонимизни қобул қилған түмәнталдики йәнә бир кәнт кадириму өз кәнтидики исмаил давутниң әнә шу 14-аһалиләр районида икәнлики вә уларниң 98% әркин һаләттә яшаватқанлиқини илгири сүрди. Биз униңдин исмаил давутниң һаятиниң шу әркин болмиған 2% лик қисминиң қайси икәнликини сориғинимизда, у исмаил давутниң түмәнталдики ата-аниси билән көрүшүш үчүн чоқум қорудин рухсәт елип чиқиши керәкликини ашкарилиди. Бу кадир мәзкур қоруға өзиниң берип бақмиғанлиқи, әмма тутқун исмаил давут ата-аниси билән көрүшкини чиққанда, уни хизмәт мунасивити билән зиярәт қилғанлиқи вә бу җәрянда мәзкур аилиликләр лагериниң ички әһвали һәққидә бир қисим мәлуматларға еришкәнликини баян қилди. Дейилишичә исмаил давут бу кәнт кадириға мәзкур қоруниң ичидә өзлиригә охшаш 7миңчә киши барлиқини, буларниң әслидә мәкит наһийәсиниң һәрқайси йеза базарлиридин лагерға топланған кишиләр икәнликини доклат қилған. У йәнә қоруниң ичидә мәктәп, давалиниш орни, йәсли вә сода сетиқ орунлири вә завут карханиларниңму барлиқини тилға алған.

Уйғур райониниң рәиси шөһрәт закир өткән йили ахбаратқа қилған сөзидә аталмиш тәрбийәләш мәркизидикиләрниң 90% иниң қоюп берилгәнлики вә ишқа орунлашқанлиқини ейтқан; әмма һазирғичә лагердикиләрдин аз сандики алаһидә әһвалдики тутқунлардин башқилириниң йәни мутләқ көпчиликиниң қоюп берилгәнлики һәққидә һечқандақ хәвәр болмиған. Илгирики ениқлашлиримизда 280 миң нопуслуқ мәкит наһийәсидә 50 миңдин артуқ кишиниң лагерда икәнлики илгири сүрүлгән. Әгәр 7 миңчә киши лагердин чиққанлар үчүн тәйярланған аилиликләр лагериға орунлаштурулған болса, қалғанлириниң қандақ бир тәрәп қилинғанлиқи һазирчә мәлум әмәс.

Пикирләр (0)
Share
Толуқ бәт