Mekitte "14‏-Ahaliler rayoni" namida mexsus lagérdin chiqqanlar üchün a'ililikler lagéri qurulghan

Muxbirimiz shöhret hoshur
2020-08-04
Élxet
Pikir
Share
Print
Turpan'gha sélin'ghan melum "Qayta terbiyelesh merkizi".
Turpan'gha sélin'ghan melum "Qayta terbiyelesh merkizi".
Social Media

Weziyettin xewerdar kishilerdin biri mekit nahiyeside lagérdin qoyup bérilgenler üchün mexsus bir a'ililikler qorusi sélin'ghanliqi, 7000 din artuq a'ile sighidighan bu qorugha kirip-chiqishning cheklen'genlikini pash qilghan idi. Muxbirimizning éniqlashliri dawamida mekitning tümental yézisidin lagérgha ekétilgen isma'il dawutning lagérdiki atalmish öginishini tügetkendin kéyin, "14-Ahaliler rayoni" dep nam bérilgen lagérdin chiqqanlar lagérigha orunlashturulghan. Melum bolushiche, bu lagérning normal lagérdin perqi tutqunlarning peqet a'ilisi bilen birlikte yashash imkanigha ige bolushidur.

Weziyettin xewerdar kishilerdin biri radiyomizgha inkas yollap, mekit nahiyiside lagérdin chiqqanlar üchün mexsus lagér qurulghanliqi, bu jaydimu ilgiriki lagérda dawam qilghan siyasiy öginish, özini tekshürüsh, mesile tapshurushlarning dawam qilidighanliqi ؛ peqet bu lagérda tutqunlarning a'ilisi bilen bille yashaydighanliqini melum qilghanidi. Inkasta yene bu qoruda yüzlerche a'ililikler binasi barliqi, bu qorugha kirip-chiqishning cheklen'genliki eskertilgenidi. Bu heqte élip barghan éniqlashlirimiz dawamida, mekit nahiyesidiki alaqidar organlar bu témida gep qilishtin özlirini tartti. Mekitning tümental yézisidin téléfonimizni qobul qilghan bir kent saqchisi, bu kentte mekittiki shu lagérdin chiqqanlar a'ililikler lagérida isma'il dawut isimlik bir kishi barliqini ashkarilidi. Uning déyishiche, isma'il dawut lagérdin chiqqandin kéyin tümentaldiki öyige emes, mekit nahiye baziridiki mezkur qoruning ichige orunlashturulghan؛ nöwette u ene shu qoruning ichide ayal-baliliri bilen bille yashaydiken؛ emma tümentaldiki ata-anisi we uruq-tughqanliri bilen körüshüsh üchün mexsus qorudin chiqish ruxsetnamisi élishi kérek iken. Bu qoruning "14-Ahaliler rayoni" dep atilidighanliqini tilgha alghan bu saqchi xadimning déyishiche, bu qoruda yüzlerche a'ililikler binasi mewjut iken.

Téléfonimizni qobul qilghan tümentaldiki yene bir kent kadirimu öz kentidiki isma'il dawutning ene shu 14-ahaliler rayonida ikenliki we ularning 98% erkin halette yashawatqanliqini ilgiri sürdi. Biz uningdin isma'il dawutning hayatining shu erkin bolmighan 2% lik qismining qaysi ikenlikini sorighinimizda, u isma'il dawutning tümentaldiki ata-anisi bilen körüshüsh üchün choqum qorudin ruxset élip chiqishi kéreklikini ashkarilidi. Bu kadir mezkur qorugha özining bérip baqmighanliqi, emma tutqun isma'il dawut ata-anisi bilen körüshkini chiqqanda, uni xizmet munasiwiti bilen ziyaret qilghanliqi we bu jeryanda mezkur a'ililikler lagérining ichki ehwali heqqide bir qisim melumatlargha érishkenlikini bayan qildi. Déyilishiche isma'il dawut bu kent kadirigha mezkur qoruning ichide özlirige oxshash 7mingche kishi barliqini, bularning eslide mekit nahiyesining herqaysi yéza bazarliridin lagérgha toplan'ghan kishiler ikenlikini doklat qilghan. U yene qoruning ichide mektep, dawalinish orni, yesli we soda sétiq orunliri we zawut karxanilarningmu barliqini tilgha alghan.

Uyghur rayonining re'isi shöhret zakir ötken yili axbaratqa qilghan sözide atalmish terbiyelesh merkizidikilerning 90% ining qoyup bérilgenliki we ishqa orunlashqanliqini éytqan؛ emma hazirghiche lagérdikilerdin az sandiki alahide ehwaldiki tutqunlardin bashqilirining yeni mutleq köpchilikining qoyup bérilgenliki heqqide héchqandaq xewer bolmighan. Ilgiriki éniqlashlirimizda 280 ming nopusluq mekit nahiyeside 50 mingdin artuq kishining lagérda ikenliki ilgiri sürülgen. Eger 7 mingche kishi lagérdin chiqqanlar üchün teyyarlan'ghan a'ililikler lagérigha orunlashturulghan bolsa, qalghanlirining qandaq bir terep qilin'ghanliqi hazirche melum emes.

Toluq bet