Долқун әйса: “ ‛5-април барин вәқәси‚ ни дуня миқясида хатириләш қарар қилинди”

Әнқәрәдин ихтиярий мухбиримиз әркин тарим тәйярлиди
2024.04.02
dolqun-eysa-2024 Дуня уйғур қурултийиниң рәиси долқун әйса 2024-йилини күтүвелиш нутуқи сөзләватиду. 2023-Йили 31-декабир, мюнхен
duq.tv

30-Март күни дуня уйғур қурултийи иҗраийә комитетиниң кеңәйтилгән йиғинида йеқинқи заман уйғур дәвасида дәвр бөлгүч әһмийәткә игә “5-април барин вәқәси” ни пүтүн дуня миқясида өткүзүш қарар қилинди.

Торда өткүзүлгән бу йиғинға дуня уйғур қурултийи иҗраийә комитетиниң америка, канада, японийә, австралийә, түркийә қатарлиқ он нәччә дөләттики әзалири, һәр қайси комитетларниң мудир, муавин мудирлири вә дуня уйғур қурултийини қоллаватқан аммиви тәшкилатлириниң мәсуллири болуп 80 киши иштирак қилди.

Йиғинда 4-айниң 5-күни барин вәқәсини хатириләш вә 4-айда америкида өткүзүлидиған паалийәтләр тоғрисида музакирә болди. Көпчиликкә мәлум болғинидәк, 1990-йили 4-айниң 5-күни қәшқәр ақту наһийәсигә қарашлиқ барин йезисида бир қисим яшлар хитайниң пиланлиқ туғут намида уйғурларни йоқ қилиш сияситигә наразилиқ билдүрүп қозғалғанда, қанлиқ бастурулған иди. Дуня уйғур қурултийи қурулған күндин тартип, 5-апрел күнини дуняниң һәр қайси җайлирида һәр хил паалийәтләр билән хатириләп кәлмәктә.

Бу қетимқи йиғинда, дуня уйғур қурултийи “5-апрел барин вәқәси” ни пүтүн дуня миқясида кәң даиридә хатириләшни чақириқ қилди. Дуня уйғур қурултийи рәиси долқун әйса әпәнди мәзкур чақириқ тоғрисида мундақ деди: “бу йил 5-апрелда барин вәқәсиниң йүз бәргәнликигә 34 йил болиду. Барин вәқәси шәрқий түркистан азадлиқ инқилабидики дәвр бөлгүч тарихий әһмийәткә игә бир вәқә. Шуңа һәр йили бу күнни охшимиған шәкилдә хатириләп, шеһитлиримизни әсләп келиватимиз. Шуңа бу қетим чақирған йиғинимизниң муһим күнтәртиплиридин бири барин вәқәсиниң 34 йиллиқини қандақ хатириләш мәсилиси болди. Бу йиғинда дуняниң һәрқайси җайлиридики шәрқий түркистан аммиви тәшкилатлириниң охшимиған шәкилдә хатириләш паалийити өткүзүши қарар қилинди”.

Долқун әйса әпәнди, дуняниң һәр қайси җайлирида елип берилидиған паалийәтләр тоғрисида радийомизға мәлумат берип мундақ деди: “рамизан ейи болушиға қаримай, германийәдә, японийәдә, явропа дөләтлиридә вә америкада намайишлар болмақчи. Бәзи дөләтләрдә иптарда хатириләш паалийәтлири болиду. Оттура асия дөләтлиридә барин шеһитлириниң роһиға атап қуран тилавәт қилиниду. Түркийә, канада, австралийә вә башқа дөләтләрдиму шеһитлиримизни хатириләш, хитайға наразилиқ билдүрүш паалийәтлири болмақчи”.

Дуня уйғур қурултийиниң муавин рәиси пәрһат муһаммәди әпәнди радийомизға қилған сөзидә, бу қетимқи йиғинда, 4-айниң 17-күнидин 18-күнигичә ню-йорк шәһиридә чақирилидиған “мәҗбурий әмгәкни асас қилған муһакимә йиғини”, 16-апрел күни америка дөләт мәҗлисидә өткүзүлидиған паалийәт вә алдимиздики айларда елип берилидиған бәзи паалийәтләр тоғрисида муһим қарарларниң елинғанлиқини оттуриға қойди.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.