Dolqun eysa: “ ‛5-april barin weqesi‚ ni dunya miqyasida xatirilesh qarar qilindi”

Enqeredin ixtiyariy muxbirimiz erkin tarim teyyarlidi
2024.04.02
dolqun-eysa-2024 Dunya Uyghur qurultiyining re'isi dolqun eysa 2024-yilini kütüwélish nutuqi sözlewatidu. 2023-Yili 31-dékabir, myunxén
duq.tv

30-Mart küni dunya Uyghur qurultiyi ijra'iye komitétining kéngeytilgen yighinida yéqinqi zaman Uyghur dewasida dewr bölgüch ehmiyetke ige “5-April barin weqesi” ni pütün dunya miqyasida ötküzüsh qarar qilindi.

Torda ötküzülgen bu yighin'gha dunya Uyghur qurultiyi ijra'iye komitétining amérika, kanada, yaponiye, awstraliye, türkiye qatarliq on nechche dölettiki ezaliri, her qaysi komitétlarning mudir, mu'awin mudirliri we dunya Uyghur qurultiyini qollawatqan ammiwi teshkilatlirining mes'ulliri bolup 80 kishi ishtirak qildi.

Yighinda 4-ayning 5-küni barin weqesini xatirilesh we 4-ayda amérikida ötküzülidighan pa'aliyetler toghrisida muzakire boldi. Köpchilikke melum bolghinidek, 1990-yili 4-ayning 5-küni qeshqer aqtu nahiyesige qarashliq barin yézisida bir qisim yashlar xitayning pilanliq tughut namida Uyghurlarni yoq qilish siyasitige naraziliq bildürüp qozghalghanda, qanliq basturulghan idi. Dunya Uyghur qurultiyi qurulghan kündin tartip, 5-aprél künini dunyaning her qaysi jaylirida her xil pa'aliyetler bilen xatirilep kelmekte.

Bu qétimqi yighinda, dunya Uyghur qurultiyi “5-Aprél barin weqesi” ni pütün dunya miqyasida keng da'iride xatirileshni chaqiriq qildi. Dunya Uyghur qurultiyi re'isi dolqun eysa ependi mezkur chaqiriq toghrisida mundaq dédi: “Bu yil 5-aprélda barin weqesining yüz bergenlikige 34 yil bolidu. Barin weqesi sherqiy türkistan azadliq inqilabidiki dewr bölgüch tarixiy ehmiyetke ige bir weqe. Shunga her yili bu künni oxshimighan shekilde xatirilep, shéhitlirimizni eslep kéliwatimiz. Shunga bu qétim chaqirghan yighinimizning muhim küntertipliridin biri barin weqesining 34 yilliqini qandaq xatirilesh mesilisi boldi. Bu yighinda dunyaning herqaysi jayliridiki sherqiy türkistan ammiwi teshkilatlirining oxshimighan shekilde xatirilesh pa'aliyiti ötküzüshi qarar qilindi”.

Dolqun eysa ependi, dunyaning her qaysi jaylirida élip bérilidighan pa'aliyetler toghrisida radiyomizgha melumat bérip mundaq dédi: “Ramizan éyi bolushigha qarimay, gérmaniyede, yaponiyede, yawropa döletliride we amérikada namayishlar bolmaqchi. Bezi döletlerde iptarda xatirilesh pa'aliyetliri bolidu. Ottura asiya döletliride barin shéhitlirining rohigha atap qur'an tilawet qilinidu. Türkiye, kanada, awstraliye we bashqa döletlerdimu shéhitlirimizni xatirilesh, xitaygha naraziliq bildürüsh pa'aliyetliri bolmaqchi”.

Dunya Uyghur qurultiyining mu'awin re'isi perhat muhammedi ependi radiyomizgha qilghan sözide, bu qétimqi yighinda, 4-ayning 17-künidin 18-künigiche nyu-york shehiride chaqirilidighan “Mejburiy emgekni asas qilghan muhakime yighini”, 16-aprél küni amérika dölet mejliside ötküzülidighan pa'aliyet we aldimizdiki aylarda élip bérilidighan bezi pa'aliyetler toghrisida muhim qararlarning élin'ghanliqini otturigha qoydi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.