Абликим йүсүп хитайға қайтурулуш хәвпидин қутулған

Ихтиярий мухбиримиз әркин тарим
2019-08-05
Елхәт
Пикир
Share
Принт
Боснийәдин қатарға қайтурулған абликим йүсүп.
Боснийәдин қатарға қайтурулған абликим йүсүп.
Social Media

31-Июл күни айропилан билән боснийә пайтәхти сарайевоға чүшкәндә, боснийә уни киргүзмигәндин кейин қатар авиатсийә ширкитиниң айропилани билән қатар пайтәхти доһаға қайтурулған 53 яшлиқ абликим йүсүп әпәндиниң 3-авғуст күни әтигән саәт 11дә өзиниң бейҗиңға қайтурулидиғанлиқини билдүрүп, иҗтимаий таратқулар арқилиқ хәлқарадин вә уйғурлардин ярдәм тәләп қилип тарқатқан учури һәр қайси дөләтләрдики уйғурларни һәрикәткә өткүзди.

Мәзкур учур қисқа вақит ичидә миңлиған киши тәрипидин һәмбәһирлинип тарқитилди. У, мәзкур синалғу учурида мундақ дегән: «мениң исим-фамиләм абликим йүсүп, тегим хотәнлик. Пакистанда турувататтим, йеқиндин буян у җайда уйғурлар үчүн бәк қейин болуп кетип, миң тәсликтә сиртқа чиқип кетәй дәп, боснийәниң пайтәхти сарайевоға кәлсәм, мени сарайево айродромдин қайтуруп доһаға әкелип қойди. Булар әтә әтигән доһадин бейҗиңға йолға салимиз дәп беләтни тәйярлап қойди. Мән қайтмаймән демәй уларни хатирҗәм қилип турдум, маңа хәлқараниң вә достларниң ярдими керәк». 

Бу хәвәр тарқитилғандин кейин д у қ рәһбәрлири дәрһал һәрикәткә өтүп, америка қошма штатлири вә германийә һөкүмитиниң мунасивәтлик органлири билән алақә орнитип, уни қутулдурушқа тиришқан. Д у қ рәиси долқун әйса әпәнди бу һәқтики зияритимизни қобул қилип, бу хәвәр тарқалғандин кейин америка қошма штатлири ташқи ишлар министирлиқи билән германийә ташқи ишлар министирлиқлири билән көрүшүш арқилиқ абликим йүсүпниң хитайға қайтурулуш хәвпиниң йоқ қилинғанлиқини баян қилди. 

Д у қ рәиси долқун әйса әпәнди абликим йүсүп әпәндиниң хитайға қайтурулуш хәвпидин қутулған болсиму, лекин үчинчи дөләткә кетиш мәсилисиниң техи һәл болмиғанлиқини баян қилди. 

Хитай әлчиханилириниң 2017-йилидин тартип бәзи дөләтләрдики уйғурларниң паспортини узартип бәрмәйватқанлиқи билдүрүлмәктә. Бу бирқисим дөләтләрдә өзлириниң келәчикини көрәлмәйватқан уйғурлар хатирҗәм яшайдиған дөләтләргә кетишкә тиришмақта. Д у қ рәиси долқун әйса әпәнди бундақ уйғурлар диққәт қилишқа тегишлик ишлар тоғрисида тохталди. 

Абликим йүсүп әпәнди 4-авғуст күни зияритимизни қобул қилип, мунасивәтлик кишиләрниң өзи билән сөһбәт өткүзгәнликини, өзиниң хитайға қайтурулуш хәвпидин қутулғанлиқини вә ярдәм қилғанларға рәһмәт ейтидиғанлиқини баян қилди. 

Абликим йүсүпниң хитайға қайтурулуш хәвпидин қутулушида иҗтимаий таратқуларниң роли зор болғанлиқи ейтилмақта. Униң бу һәқтә тарқатқан учури қисқа вақит ичидә мунасивәтлик кишиләрниң диққитини тартқан. Тунҗи болуп бу учурни тарқатқан уйғур зиялийси нәбиҗан әла әпәнди бу һәқтә тохталди. 

Абликим йүсүп хотән вилайитидин болуп, у бу йил 53 яшқа киргән. Өзиниң радийомизға билдүрүшичә, у узун мәзгил пакистанда тиҗарәт билән шуғулланған вә йеқинқи мәзгилләрдә пакистанда йүз бериватқан әнсизликләр түпәйлидин пакистандин өзлүкидин айрилғаникән.

Толуқ бәт