Ablikim yüsüp xitaygha qayturulush xewpidin qutulghan

Ixtiyariy muxbirimiz erkin tarim
2019-08-05
Élxet
Pikir
Share
Print
Bosniyedin qatargha qayturulghan ablikim yüsüp.
Bosniyedin qatargha qayturulghan ablikim yüsüp.
Social Media

31-Iyul küni ayropilan bilen bosniye paytexti sarayéwogha chüshkende, bosniye uni kirgüzmigendin kéyin qatar awi'atsiye shirkitining ayropilani bilen qatar paytexti dohagha qayturulghan 53 yashliq ablikim yüsüp ependining 3-awghust küni etigen sa'et 11de özining béyjinggha qayturulidighanliqini bildürüp, ijtima'iy taratqular arqiliq xelq'aradin we Uyghurlardin yardem telep qilip tarqatqan uchuri her qaysi döletlerdiki Uyghurlarni heriketke ötküzdi.

Mezkur uchur qisqa waqit ichide minglighan kishi teripidin hembehirlinip tarqitildi. U, mezkur sin'alghu uchurida mundaq dégen: "Méning isim-familem ablikim yüsüp, tégim xotenlik. Pakistanda turuwatattim, yéqindin buyan u jayda Uyghurlar üchün bek qéyin bolup kétip, ming teslikte sirtqa chiqip kétey dep, bosniyening paytexti sarayéwogha kelsem, méni sarayéwo ayrodromdin qayturup dohagha ekélip qoydi. Bular ete etigen dohadin béyjinggha yolgha salimiz dep béletni teyyarlap qoydi. Men qaytmaymen démey ularni xatirjem qilip turdum, manga xelq'araning we dostlarning yardimi kérek". 

Bu xewer tarqitilghandin kéyin d u q rehberliri derhal heriketke ötüp, amérika qoshma shtatliri we gérmaniye hökümitining munasiwetlik organliri bilen alaqe ornitip, uni qutuldurushqa tirishqan. D u q re'isi dolqun eysa ependi bu heqtiki ziyaritimizni qobul qilip, bu xewer tarqalghandin kéyin amérika qoshma shtatliri tashqi ishlar ministirliqi bilen gérmaniye tashqi ishlar ministirliqliri bilen körüshüsh arqiliq ablikim yüsüpning xitaygha qayturulush xewpining yoq qilin'ghanliqini bayan qildi. 

D u q re'isi dolqun eysa ependi ablikim yüsüp ependining xitaygha qayturulush xewpidin qutulghan bolsimu, lékin üchinchi döletke kétish mesilisining téxi hel bolmighanliqini bayan qildi. 

Xitay elchixanilirining 2017-yilidin tartip bezi döletlerdiki Uyghurlarning pasportini uzartip bermeywatqanliqi bildürülmekte. Bu birqisim döletlerde özlirining kélechikini körelmeywatqan Uyghurlar xatirjem yashaydighan döletlerge kétishke tirishmaqta. D u q re'isi dolqun eysa ependi bundaq Uyghurlar diqqet qilishqa tégishlik ishlar toghrisida toxtaldi. 

Ablikim yüsüp ependi 4-awghust küni ziyaritimizni qobul qilip, munasiwetlik kishilerning özi bilen söhbet ötküzgenlikini, özining xitaygha qayturulush xewpidin qutulghanliqini we yardem qilghanlargha rehmet éytidighanliqini bayan qildi. 

Ablikim yüsüpning xitaygha qayturulush xewpidin qutulushida ijtima'iy taratqularning roli zor bolghanliqi éytilmaqta. Uning bu heqte tarqatqan uchuri qisqa waqit ichide munasiwetlik kishilerning diqqitini tartqan. Tunji bolup bu uchurni tarqatqan Uyghur ziyaliysi nebijan ela ependi bu heqte toxtaldi. 

Ablikim yüsüp xoten wilayitidin bolup, u bu yil 53 yashqa kirgen. Özining radiyomizgha bildürüshiche, u uzun mezgil pakistanda tijaret bilen shughullan'ghan we yéqinqi mezgillerde pakistanda yüz bériwatqan ensizlikler tüpeylidin pakistandin özlükidin ayrilghaniken.

Toluq bet