Xitayning teshwiqat apparati bolghan CGTN qanili "StillNoInfo#" herikitini qarilashqa urunmaqta

Muxbirimiz irade
2019-12-30
Share
CGTN-StillNoInfo.jpg Xitayning teshwiqat apparati bolghan CGTN qanili "StillNoInfo#" herikitini qarilashqa urunmaqta.
Social Media

Hörmetlik radiyo anglighuchilar, yéqindin buyan xitayning chet'ellerge qaratqan teshwiqat wasitisi bolghan CGTN qanili, yeni "Xitay yer shari téléwiziye tori" özining yuwtub we tiwittirdiki hésabliri arqiliq qisqa widiyolarni tarqitip, chet'ellerdiki Uyghurlarning yéqinqi 2-3 yildin buyan iz-dérikini qilalmaywatqan uruq-tughqanliri heqqide bergen guwahliqlirining yalghanliqini ilgiri sürmekte. Bu widiyolarda yéqinda chet'ellerdiki Uyghurlar ijtima'iy alaqe torida ishlitiwatqan "StillNoInfo#" yeni "Téxiche uchur yoq" herikiti asasliq nishan qilinip turup: "Téxiche uchur yoq xeshteg herikitige zerbe, biz uni taptuq", "Téxiche uchur yoq, kim yalghan sözlewatidu" qatarliq témilarda widiyo tarqatqan.

CGTN Qanili 26-dékabir küni tarqatqan bu heqtiki widiyoda özini muxbir dep tonushturghan bir ayal töwendikilerni bayan qilidu: "Yéqindin buyan chet'ellerdiki tor betlerde xitaydiki yoqap ketken uruq-tughqanlirini izdesh herikiti qozghaldi. Bu shexsler we organlar téxiche uchur yoq, dégen xeshtegni qollinip turup chiqarghan uchurlirida terbiyeleshni tügetken tughqanlirining yoqap ketkenlikini ilgiri sürüshti. CGTN Shinjanggha adem ewetip, atalmish yoqap ketküchiler üstide tekshürüsh élip bardi" deydu. 

CGTN Qanili öz widiyolirida chet'ellerdiki uruq-tughqanliri teripidin sürüshtürülgen mahire, xénimxan turdi we eziz niyaz qatarliq kishilerni öyliride we atalmish ish yerliride körsitish arqiliq ularning "Yoqap ketmigenliki", eksiche normal hayatini dawamlashturuwatqanliqini ilgiri sürüp, "Téxiche uchur yoq" herikitining yalghanchiliq ikenlikini ilgiri sürmekchi bolghan.

"Téxiche uchur yoq" xeshtegi bilen bashlan'ghan bu heriket esli amérikada özining dadisining iz-dérikini qilip dawa qiliwatqan yash pa'aliyetchi behram sintashning teshebbusi bilen otturigha chiqqan tor herikiti idi. U bügün radiyomizning ziyaritini qobul qilip, CGTN eger heqiqeten "Téxiche uchur yoq herikitining yalghanchiliq ikenlikini ispatlimaqchi bolsa, aldi bilen bu heriketning bashlamchisi bolghan méning tughqanlirimni, yeni méning dadamni manga körsetsun", dédi. 

Amérika awam palatasi 3-dékabir küni Uyghur qanun layihesini mutleq köp san awaz bilen qollighandin kéyin xitay da'iriliri derhal béyjingda axbarat élan qilish yighini chaqirghan. 9-Dékabirdiki axbarat yighinda Uyghur aptonom rayonining re'isi shöhret zakir bayanat bérip, atalmish "Kespiy terbiyelesh merkezliri" namidiki lagérlarda tutup turuluwatqan tutqunlarning "Oqush" püttürüp, öylirige qaytqanliqini bildürgen. Netijide chet'ellerde hélihem uruq-tughqanliridin xewer alalmaywatqan Uyghurlar behram qurban sintashning herikitige awaz qoshup uruq-tughqanlirini sürüshte qilishni kücheytken. 

Behram bu heqtiki sözide xitay hökümitining yuqiridiki bu teshwiqat herikitingmu xuddi ilgiriki heriketliridek meghlup bolidighanliqini, chünki chet'ellerdiki Uyghurlarning yurtidiki uruq-tughqanliri bilen normal alaqisi pütünley eslige kelmey turup, peqet bir qanche Uyghurni anda-sanda widiyolarda körsitish arqiliq xitay hökümitining héchkimni aldiyalmaydighanliqini bildürdi.

Derweqe, yuqiridiki bu widiyolargha nurghun tiwittir qollan'ghuchiliri inkas qayturup, xitayning bundaq saxta we sehnileshtürülgen körünüshler bilen emdi héchkimni aldap bolalmaydighanliqini bildurüshken we yuqiridiki bu atalmish "Muxbirlar" ni tenqid qilghan. 

CGTN Qanili xitayning merkizi téléwiziye istansisi CCTV ge qarashliq bolghan qanal bolup, uning in'gilizchidin bashqa yene, erebche, latinche we rosche tarqitishliri bar. Amérika edliye ministirliqi 2018-yili séntebirde qarar chiqirip, xitayning shinxu'a agéntliqi bilen uninggha qarashliq eng chong xelq'araliq téléwiziye tori CGTN qanilini musteqil xewer orgini emes, belki "Chet'el agéntliri" yeni "Chet'el wakaletchisi" qatarida tizimlash heqqide buyruq chiqarghan.

"Wal-sitrit zhornili" ning bu heqtiki xewiridin qarighanda, "Chet'el wakaletchilirini tizimlash qanuni" amérikida 1938‏-yilidin buyan ijra qiliniwatqan bolup, qisqartilip FARA dep atilidiken. Mezkur qanun chet'el hökümetlirining axbarat wasitisi arqiliq amérika jama'et pikirige we bu arqiliq amérika hökümitige tesir körsitishining aldini élish üchün tüzülgen, yeni musteqil axbarat orgini bolmighan, chet'el hökümetlirining qaniti bolghan axbarat orunlirining amérikida jasusluq rolini oynap qélishining aldini élishni meqset qilghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet