Istanbulda "Abduréhim ötkür izliri" namliq edebiyat-sen'et muhakime yighini ötküzüldi

Ixtiyariy muxbirimiz arslan
2021-07-08
Share
Istanbulda "Abduréhim ötkür izliri" namliq edebiyat-sen'et muhakime yighinida merhum yazghuchi abduréhim ötkür ependining shiwétsiyede yashawatqan qizi zulhayat ötkür sözlimekte. 2021-Yili 8-iyul, türkiye.
RFA/Arslan

8-Iyul peyshenbe küni istanbulda "Abduréhim ötkür izliri" namliq edebiyat-sen'et muhakime yighini ötküzüldi. Bu muhakimige Uyghur edebiyatigha qiziqidighan köpligen yash heweskarlar qatnashti.

Bu muhakime yighini istanbuldiki yazghuchilar jem'iyitining yighin zalida ötküzüldi. Yighinda merhum yazghuchi abduréhim ötkürning shiwétsiyede yashawatqan newre qizi zulhayat ötkür, Uyghur edebiyati tetqiqatchiliridin mexmutjan yasin, yash Uyghur sha'iri imran sadayi we muzikant shöhret nur qatarliq kishiler söz qildi. Yighin jeryanida Uyghur edebiyati we merhum yazghuchi abduréhim ötkürning ijadiyetliri toghrisida tepsiliy muhakime élip bérildi.

Zulhayat ötkür xanim abduréhim ötkürning ijadiyetliri toghrisida toxtilip ötti. U merhum yazghuchi abdurehim ötkürning 1980-yillarda "Iz", "Oyghan'ghan zémin" qatarliq tarixiy romanlarni yézish jeryanida japaliq izdinish élip bérip, nurghun matériyal toplighanliqini, qomul rayonida uzun emeliy tekshürüsh élip bérip tömür xelpe we xojaniyaz hajim qatarliq milliy inqilab yétekchiliri we ular bashchiliq qilghan qozghilanglar toghriliq shahitlarning köpligen bayanlirini ün'alghugha élip yighqanliqini, bu jeryanda 200 danidin artuq ün'alghu léntisining toplan'ghanliqini bayan qilip ötti.

Yighinda yash sha'ir imran sadayi merhum sha'ir abduréhim ötkürning "Iz" namliq shé'irni jarangliq dékilimatsiye qilip, yighin ishtirakchilirining qizghin alqishqa érishti.

Zulhayat ötkür xanim sözide merhum sha'ir abduréhim ötkürning "Xejle, xa'inlar xejle" dégen shé'irning hazirqi zaman'ghimu uyghun kélidighanliqini shundaqla bu shé'irning yézilish jeryani hem arqa körünüshidiki échinarliq weqeni sözlep ötti.

Edebiyat tetqiqatchisi mexmutjan yasin abduréhim ötkürning 20-esirdiki Uyghur edebiyatigha heqiqiy re'ishte wekillik qilidighan muhim yazghuchilarning biri ikenlikini tekitlep ötti. U abdurehim ötkürning "Men aq bayraq emes" dégen shé'irning yézilish sewebi toghrisida toxtaldi. Uning bildürishiche, eyni waqitta xéli nami bar bir xitay sha'iri xantengri choqqisini aq bayraqqa oxshitip shé'ir yazghanliqi melum. Buningdin qattiq ghezeblen'gen abduréhim ötkür shu waqitta "Men aq bayraq emes" namliq shé'irini yézip chiqqan iken. Mexmutjan yasin abduréhim ötkürning ayali merhum xelchem tileshéwa xanimdin neqil keltürüp, bu shé'irning yézilishidiki arqa körünüshni tonushturup ötti.

Yighin dawamida yash sha'ir imran sadayi, muzikant shöhret nurning rawab bilen tengkesh qilishi arqisida abduréhim ötkürning "Men aq bayraq emes" dégen shé'irni jarangliq dékilimatsiye qildi.

Mexmutjan yasin ependi abduréhim ötkürning pütkül shé'irlirining xelqni erkinlikke we hörlükke chaqirip kelgenlikini, her bir shé'iriy misrasida ana tupraqqa we öz xelqige bolghan yalqunluq muhebbetning yélinjap turudighanliqini tekitlep ötti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet