Sin'gaporda oqup qaytqan doxtur abduqéyyum yasinning 4 yildin buyan tutqunda ikenliki delillendi

Muxbirimiz shöhret hoshur
2021-10-05
Share
Sin'gaporda oqup qaytqan doxtur abduqéyyum yasinning 4 yildin buyan tutqunda ikenliki delillendi Qeshqer kérembagh doxturxanisining iz-dériki ghayib bolghan kespiy xadimliridin biri, sin'gaporda oqup qaytqan mudir wrach doxtur abduqéyum yasin ependi. (Waqti we orni éniq emes)
Oqurmen teminligen

Qeshqer kérembagh doxturxanisining iz-dériki ghayip bolghan kespiy xadimliridin biri, sin'gaporda oqup qaytqan mudir wirach doxtur abduqéyyum yasin idi. Muxbirimizning éniqlashliri dawamida uning 4 yildin buyan tutqunda ikenliki delillendi.

Inkaslardin melum bolushiche, chet elde oqup qaytish Uyghur rayonida xitaylar üchün mu'ashi ösüsh, mertiwisi yüksilish qatarliq köp xil imtiyazlarni ata qiliwatqan bolsa, Uyghurlar üchün "Gumanliq unsur" gha aylinish we axirida türmige tashlinish qatarliq échinishliq qismetlerge muptila qilmaqta. Déyilishiche, buning bir tipik misali sin'gaporda oqup qaytqan mudir wirach doxtur abduqéyyum yasindur.

Nöwette chet elde yashawatqan, ilgiri qeshqerde méditsina saheside xizmet qilghan bir muhajirning radiyomizgha inkas qilishiche, 2017 ‏-yilning béshida qeshqer kérembagh doxturxanisida bir jiddiy yighin échilghan. Sheherlik intizam tekshürüsh komitétining xadimliri we dölet amanliq saqchiliri qatnashqan bu yighinda, bir türküm doxtur we séstiralarning ismi atilip otturigha élip chiqilghan. Yighinda ularning "Gumanliq kishiler" ikenliki we tekshürülidighanliqi bildürülüp, yighin meydanidin saqchixanigha élip kétilgen. Shu qétim tutup ekitilgendin bügün'ge qeder iz-dériki bolmaywatqan bu kishilerdin biri abduqéyyum yasin bolup, uning iz-déreskiz ghayip bolghanliqi norwigiyediki "Uyghuryar fondi" ning tizimlikide qeyt qilin'ghan. "Uyghuryar fondi" ning türkiyediki wekili batur qarixanli ependining tonushturushiche, abduqéyyum yasin shangxeydiki bir méditsina oniwérsitétini püttürgendin kéyin sin'gaporda bilim ashurghan we tutqun qilinishning aldida qeshqer kérembagh doxturxanisining tashqi késeller bölümide bölüm bashliqi bolup wezipe ötewatqan iken.

Qeshqer kérembagh doxturxana xadimliri deslepte bu doxturxanida bundaq bir xadimning bolghanliqini ret qildi, arqidin bu doxturxanida 3000din artuq ishchi-xizmetchi barliqini bildürüp, bundaq bir kishi bolghan teqdirdimu tonumaydighanliqini éytti.

Inkaschi muhajirning radiyomizgha inkas qilishiche, uning kompyotéridin tépilghan "Qanunsiz matériyallar" uning tutulush sewepliridin biri bolup qalghan. Uning yene eskertishiche, u tekshürülüsh jeryanida sin'gaporda oquwatqan mezgilide kimler bilen téléfonda sözleshkenliki we kimler bilen körüshkenliki heqqide nuqtiliq soraq qilin'ghan. Bu muhajirning xewer tépishiche, uning shu mezgilde xitay ichi-sirtidiki dostliri bilen qilishqan parangliri "Bölgünchilikni teshwiq we bölgünchilikke qutratquluq qilish" dep qaralghan.

Kérembagh doxturxanisining xadimliri abduqéyyum yasinning qachandin béri xizmettin toxtighanliqi yaki tutulghanliqi heqqidiki so'alimizgha jawaben, bu heqte doxturxana qoghdash bölümidin melumat élishimizni tewsiye qildi.

Qoghdash bölümi xadimi abduqéyyum yasinning 4 yildin buyan ishtin toxtighanliqini ashkarilidi.

Inkaschi muhajir abduqéyyum yasinning 9 yil we yaki 15 yil késilgenliki heqqide ikki xil gep anglighanliqini melum qilghan idi. Biz bu heqte qeshqer wilayetlik ottura sot mehkimisidin melumat soriduq. Alaqidar bir xadim abduqéyyum yasinning qanche yilliq késilgenlikidin xewirini yoqluqini éytti, emma u abduqéyyum yasin isimlik bir doxtur üstidin turghuzulghan bir déloning arxiptiki tizimlikte barliqini delillidi.

Yuqirida sin'gaporda oqup qaytqan mudir wirach doxtur abduqéyyum yasinning 4 yildin buyan tutqunda ikenlikining delillen'genliki heqqide melumat berduq.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet