Bélarusiyede wapat bolghan abduraxman abdulning a'ilisi xewp astida

Ixtiyariy muxbirimiz azigh
2021-02-19
Share
Bélarusiyede wapat bolghan abduraxman abdulning a'ilisi xewp astida Korona wirusi sewebidin hayatidin ayrilghan abduraxman abdul ependi.
RFA/Azigh

Türkiye xitay munasiwetlirining yéqinlishishigha we ikki dölet otturisida bezi kélishimnamilerning tüzilishige egiship türkiyediki Uyghurlarning bixeterlik endishisi kücheymekte. Xitay dölet xewpsizlik organlirining chet'ellerdiki Uyghurlargha qaratqan tehdit sélish pa'aliyetlirining küchiyishi, jümlidin türkiyediki Uyghurlargha sélin'ghan tehditlerning salmiqining éshishi seweblik muhajirettiki uyghularning bixeter bir döletke yerlishish üchün her xil yollarni sinawatqanliqi melum.

Abduraxman we a'ilisi 1-ayning 26-küni türkiyedin bélarusiyening paytexti minsk shehirige kelgen bolup, 29-yanwar salametlik tekshürüsh jeryanida bir a'ile kishilirining korona wirusi bilen yuqumlan'ghanliqi melum bolghan.

Doxturxana abduraxmanni bir hepte dawalighandin kéyin a'ilisige peqet mushunchilik dawaliyalaydighanliqini éytip höjjet chiqip bergen. Abduraxmanning ayali nisagül xanim abduraxmanni istanbulgha qayturup kélip dawalashni telep qilghan bolsimu, da'iriler teripidin ret qilin'ghan. Korona wirusi öpkisining 70 pirsentini qaplap ketkenliki seweblik abduraxman abdul dawalash ünüm bermey 18-féwral bélarusiyede qaza qilghan.

Abduraxman abdul 2012-yili türkiyege kelgen bolup, istanbul tijaret uniwérsitétigha karxana bashqurush kespi boyiche magistirliq oqushigha qubul qilin'ghan. Iqtisadiy shara'it seweblik oqushtin chékinip istanbulda tijaret bilen shughullan'ghan.

Abduraxman bir Uyghur ziyaliysi we tijaretchi bolup gülnisa xanimning éytishiche, bundin burun er-ayal ikkisining on'gha yéqin tughqini xitay teripidin yighiwélish lagérlirigha solan'ghaniken. Uyghur ziyaliysi abduweli ayup ependi ziyaritimizni qobul qilip abduraxman abdul heqqide tepsiliy toxtaldi.

Gülnisa xanimning éytishiche, abdurahman abdul özige türkiyening özliri üchün bixeter emeslikini, türlük tehditlerge uchrawatqanliqini éytqan bolup, bir a'ile kishiliri bixeter bir döletke yerlishish arzusi bilen bélarusiyege chiqish yoli izdep kelgeniken. Abduraxman ependining tuyuqsiz qaza qilishi bu a'ilining bélarusiyedin béxeter bir döletke kétish arzusini köpükke aylandurghan.

Xitay-türkiye otturisida imzalan'ghan, emma parlaméntqa sunulush aldida turghan "Jinayetchilerni öz ara qayturup bérish kélishimi" türkiyediki Uyghurlarni qattiq sarasimige salmaqta. Közetküchiler qarishiche, bixeter bir döletke yerlishish nöwette türkiyede muhajirette yashawatqan Uyghurlar duch kelgen eng chong mesile iken.

Bélarusiye saqchi da'iriliri gülnisa xanimgha abduraxman abdulning matériyallirini xitay konsulxanisigha yollaydighanliqini, korona wirusi seweblik ölgenliki üchün méyitining xitaygha qayturulush éhtimalliqining mewjutluqini uqturghan.

Yoldishining ölümi bilen néme qilishini bilelmigen gülnisa xanim we qizi xitay pasporti bilen bélarusiyede qapsilip qalghan bolup, gülnisa xanim eger özi we qizi xitaygha qayturuwétilgen teqdirde özlirining hayatigha xewp yétishidin ensireydighanliqini éytmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet