Béyjingdiki karxanichi abduxeber muhemmedning 10 nechche kishi bilen teng sotlan'ghanliqi we 15 yilliq késilgenliki aydinglashti

Washin'gtondin muxbirimiz shöhret hoshur teyyarlidi
2023.09.06
abduxeber-muhemmet.jpg “Diniy esebiylik” we “Milliy bölgünchilik” gumani bilen tutqun qilin'ghan, Uyghurlar arisida tonulghan we béyjingda shirket qurghan abduxaber muhemmet.
Facebook/Memet Imin

Ötken heptidiki anglitishimizda béyjingda shirket achqan we netijiliri xitay axbarati teripidin bir mezgil keng teshwiq qilin'ghan yash karxanichi abduxeber muhemmedning tutqunda ikenlikini xewer qilghaniduq. Muxbirimizning ilgirilep ehwal éniqlishida dawamida, uning ötken yilning axiri 10 nechche sepdishi bilen teng sotlan'ghanliqi 15 yilliq késiwétilgenliki aydinglashti. Töwende muxbirimiz shöhret hoshurning bu heqte teyyarlighan pirogrammisi diqqitinglarda bolidu.

  Özini ashkarilashni xalimighan weziyettin xewerdar kishining ötken hepte radiyomizgha yetküzgen uchurida, béyjingda ma'arip meslihet shirkiti achqan yash karxanichi abduxeber muhemmedning diniy esebiylik we milliy bölgüchilik bilen eyiblinip sotlan'ghanliqi qeyt qilin'ghan. Uchurda yene eskertilishiche, abduxeberning diniy esebiylik bilen eyiblinishige uning ilgiri aqsudiki mezgilide bir jama'et sorunida halal yémekliklerning ehmiyiti heqqide söz qilghanliqi seweb bolghan.

 Téléfonimizni qobul qilghan béyjingdiki “Shinjangliqlargha yardem qilish we shinjangliqlarni bashqurush ishxanisi” xadimi, abduxeberning tutulush sewebi heqqide melumat bérelmeydighanliqini, chünki buning dölet mexpiyetlikige yatidighanliqini tekitlidi. Xitayning ashkarilan'ghan mexpiy höjjetliridin “Toqquzaq saqchi arxipliri” da zor bir türküm kishilerning yémek-ichmekte halal-haramni ayrighanliqi we yaki halal-haramni ayrishni teshebbus qilghanliqi üchün tutulghanliqi xatirilen'genidi.

 Yene özini ashkarilashni xalimighan, abuxeberning sawaqdashliridin biri, abduxeberning dadisining Uyghur élide tonulghan arman yémek-ichmek shirkitining aqsudiki wakaletchisi ikenliki, shunga abduxeberning dadisining sodisigha hemkarlashqan mezgilide halal yémekliklerning taziliq we bixeterlik jehettin üstünlükini sözligen bolushi mumkinlikini eskertidu.

 Weziyettin xewerdar kishining inkasida bayan qilinishiche, abduxeber halal yémekliklerning ewzelliki heqqide gep qilghan sorunda 20 ge yéqin kishi bolup, bularning hemmisila sotqa tartilghan. Inkasta déyilishiche, bu sotlan'ghanlarning ichide 3 nepiri abduxeberning tughulup ösken yézisi-kelpin nahiyesining yorchi yézisidin iken. Yorchi yézisidin téléfonimizni qobul qilghan bir kent saqchisi, yorchi yézisidin abduxeber muhemmedke chétilip 3 kishi tutulghanliq we kelpin nahiyesi boyiche 6 kishi tutulghanliqini ashkarilidi. Bu xadim yene özining körgen anglighanlirigha asasen, aqsuda échilghan sotta abduxeberning délosigha chétilip jem'iy 10 nechche kishining sotlan'ghanliqini delillidi. Özining yorchidin tutulghanlarni saqchixanigha tapshurushqila mes'ul bolghanliqini tilgha alghan bu xadim, sotning ötken yilning axiridiki bir küni etigen mezgilde qisqila échilghanliqidin xewiri bolghanliqi, emma sotning tepsilati bolupmu, eyibname heqqide xewiri bolmighanliqini eskertti.

 Weziyettin xewerdar kishining inkasida déyilishiche, abduxeberning “Milliy bölgünchilik” bilen eyiblinishige, uning shirkitining mesliheti we yol körsitishi bilen chet'elge chiqqan oqughuchilardin xitaygha qarshi pa'aliyetlerge qétilghanlarning bayqalghanliqi seweb bolghan. Ijtima'iy taratqulardin “Uyghur info” namidiki bir X (tiwittér) uchurida xewer qilishiche, abduxeber muhemmed 15 yilliq késilgen. Téléfonimizni qobul qilghan aqsu shehiridiki bir kent saqchisi, abduxeber muhemmedning 15 yilliq késilgenlikini delillesh bilen bir waqitta, uning bilen birlikte sotlan'ghanlar arisida, bir aka-ukaningmu barliqi, ularning chet'elge chiqip ketken qérindishi bilen téléfonda sözleshkenliki üchün tutulghanliqini ashkarilidi.

 Béyjingdin tutup kétilgen we 15 yilliq késiwétilgenliki bügün delillen'gen abduxeber muhemmet heqqidiki xitay xewerliride, u döletni söyidighan we döletke sadiq bir karxanichi süpitide tonushturulghan we Uyghur yashliri uningdin öginishke chaqirilghanidi. Ijtima'iy taratqulardiki inkaslardimu, abduxeber muhemmedning meyli oqush, meyli tijaret hayatida xitay hökümitining siziqidin chiqmighanliqi eskertilgenidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.