Тиҗарәтчи абдухелилниң түрмидә өлгәнлики дәлилләнди, қийин-қистақтин өлгәнлики пәрәз қилинмақта

Мухбиримиз шөһрәт һошур
2021-05-10
Share
Тиҗарәтчи абдухелилниң түрмидә өлгәнлики дәлилләнди, қийин-қистақтин өлгәнлики пәрәз қилинмақта Күнәстики йеңи түрмидә җан үзгән, ғулҗа шәһиридики төмүр содигири абдухелил һашим аяли билән. (Вақти вә орни ениқ әмәс)
Oqurmen teminligen

Күнәстики бир түрмидә җан үзгәнлики мәлум болған ғулҗа шәһәрлик тиҗарәтчи абдухелил һашим һәққидә илгириләп елип барған ениқлашлиримиз давамида, униң түрмә дохтурханисида өлгәнлики дәлилләнди. Абдухелилниң қазақистандики җийәниниң бүгүн радийомизға инкас қилишичә, абдухелилниң аяли у өлүп кетиштин икки күн бурун, униң билән екранда көрүшкән болуп, екранда абдухелил сақ-саламәт вә кәйпияти яхши һаләттә көрүнгән икән. Абдухелилниң қазақистандики туғқанлири униң түрмидә қийин-қистақтин өлгәнлик еһтималлиқини пәрәз қилишмақта.

Биз түрмидә 59 йешида җан үзгән абдухелил һашим һәққидә ғулҗидики сақчи идарилири, түрмә башқуруш идариси вә түрмә хадимлириға телефон қилдуқ. Хадимлар, көпинчә һалларда, соаллиримизға җаваб беришни рәт қилди.

Тағиси абдухелил һашим һәққидә җүмә күни радийомизға хәвәр бәргән қазақистанлиқ абдуваһап һакимниң бүгүн йәнә инкас қилишичә, бир һәптигичә униңға һечқандақ учур берәлмигән ғулҗидики уруқ-туғқанлири түнүгүн тунҗи қетим бу һәқтә еғиз ачқан. Бу еғиз ечишму, абдуваһап, өз өйидә өткүзгән нәзирниң көрүнүшини ғулҗидики уруқ-туғқанлириға йоллиғандин кейин мумкин болған. Дейилишичә, уруқ-туғқанлири бу нәзир видийосини көргәндин кейин, абдуваһапниң дадисиға йәни абдухелилниң акисиға сәвр тиләп сөз қалдурған. Әмма улар йәнила, абдухелилниң қандақ сәвәб билән өлгәнлики, җәситиниң аилигә қайтурулған-қайтурулмиғанлиқи қатарлиқ асаслиқ учурлар һәққидә еғиз ачмиған. Абдуваһап һаким йәнә өзиниң бир қисим алақә торлири арқилиқ, абдухелил һашимниң өлүмидин икки күн бурун аяли билән екранда көрүштүрлгәнлики вә аялиниң уни наһайити сағлам вә кәйпияти яхши һаләттә көргәнлики һәм бу тәсиратини шу күни уруқ-туғқан вә қолум қошнилири билән ортақлашқанлиқи һәққидә учур алған. У йәнә абдухелилниң җәситиниң аилисигә берилмигәнликидинму хәвәр тапқан. Абдуваһап һаким тағисиниң лагерға кириштин аввал өзлири билән шерик тиҗарәт қилған мәзгилидики сағламлиқи вә уруқ-туғқанлириниң абдухелилниң өлүм учурини мумкин қәдәр өзидин йошурушқа тришқанлиқи вә абдухелилниң җәситиниң аилисигә берилмигәнлики қатарлиқ учурларға асасән, болупму өлүмидин икки күн бурун аяли билән нормал екранда көрүшкәнликигә асасән, униң түрмидә қийин-қистақ вә яки бир сақчи зораванлиқи вәқәси сәвәбидин һаятидин айрилғанлиқ еһтималлиқини пәрәз қилмақта.

Биз бу әһвалларни айдиңлаштуруш үчүн, күнәстики алақидар хадимларға қайтидин телефон қилдуқ.

Тордики учурлардин мәлум болушичә, күнәстә илгирики қарабуғра түрмисидин башқа, күнәс бәштөпигә тәвә йеңи санаәт районида қурулған бир түрмә бар болуп, бу түрмә хәлқ ичидә йеңи түрмә дәп аталған. Тордики учурларда бу түрминиң орни вә көлими ениқ баян қилинған болсиму, униң нами тилға елинмиған. Мәзкур түрмә һәққидики бир сүрәтлик хәвәрдә мәһбусларға қарита диний әсәбийликни түгитиш тәрбийәси елип бериливатқанлиқи әскәртилгән. Өткән йилқи ениқлашлиримизда, абдухелил һашимниң 40 йилниң алдида бала вақтида қошнисидин алған диний сават сәвәблик диний әсәбийликкә бағлинип тутулғанлиқи мәлум болғаниди. Шуңа биз күнәстики йеңи түрмигә телефон қилип, абдухелил һашим һәққидә мәлумат соридуқ. Түрмә хизмәтчилиридин бири абдухелил һашимниң өлүп кәткәнликини дәлиллиди, әмма у җәситиниң аилисигә берилгән-берилмигәнлики һәққидә мәлумат бәрмиди. Түрминиң йәнә бир хадими, абдухелил һашимниң түрмә дохтурханисида өлгәнликини дәлиллиди. Әмма, уму абдухелилниң өлүм сәвәби, җүмлидин қийин-қистаққа вә яки сақчи зораванлиқиға учриған-учримиғанлиқи һәққидә мәлумат берәлмиди.

Илгирики ениқлашлиримизда, түрмидә җан үзгән ғулҗа хәнбиңлик диний зат абдурешит сәләйниң сақчи зораванлиқи сәвәбидин өлгәнлики униң баш қисми теңиқлиқ һаләттики җәсәт сүритидин мәлум болғаниди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт