Ablikim yüsüp: "Men yéngidin tughulghandek boldum"

Muxbirimiz gülchéhre
2019-08-07
Élxet
Pikir
Share
Print
Amérikaning yardimide xitaygha qayturulush xewpidin qutulup, qatarning doha ayroportidin uchqan ablikim yüsüp ependi amérikigha keldi. 2019-Yili 7-awghust, washin'gton.
Amérikaning yardimide xitaygha qayturulush xewpidin qutulup, qatarning doha ayroportidin uchqan ablikim yüsüp ependi amérikigha keldi. 2019-Yili 7-awghust, washin'gton.
RFA/Gülchéhre

6 -Awghust küni, amérika paytexti washin'gtondiki dallas ayridromining qarshi élish zalida bir guruppa Uyghur ikki sa'ettin artuq kütüshtin kéyin, amérikaning yardimide xitaygha qayturulush xewpidin qutulup, qatarning doha shehiridin amérika paytexti washin'gton'gha qarap uchqan ablikim yüsüpni qizghin kütüwaldi. Ziyaritimizni qobul qilghan ablikim "Men qayta tughulghandek boldum" dédi we amérika hökümiti hemde özige ghemxorluq qilghan barliq insanperwer kishilerge teshekkürini bildürdi.

Özini qarshi élishqa chiqqan Uyghurlar bilen qizghin quchaqliship körüshüshlerdin kéyin, ziyaritimizni qobul qilghan ablikim yüsüp: " Bundaq qisqa bir waqitta qutulup qélishimni oylimighan idim, bek tesirlendim, amérika hökümitige, Uyghur qérindashlargha rehmet, men yéngidin tughulghandek boldum" dep hayajan bilen sözini bashlidi.

Ablikim 2- awghust küni doha ayridromidin, özining xitaygha qayturulush xewpide qalghanliqini, dunya jama'etchilikining özini xeterdin qutquzup qélishini telep qilip ijtima'iy taratqulargha uchur tarqatqanidi. Xeterge uchrighan Uyghur musapirlar xizmitini ishlep kéliwatqan Uyghur kishilik hoquq qurulushi mudiri ömer qanat ependi:"Amérika hökümitining ablikim ependini qisqa muddet ichide bu krizistin qutuldurup qélishtek bu ghelibisi, yene bir tereptin xitaygha qarshi diplomatik ghelibe" dédi.

Ablikimning amérikagha kelgendin kéyinki turmush kapaliti we bashqa ishlarda washin'gtondiki Uyghur kishilik hoquq qurulushi, amérikadiki Uyghur jama'iti bilen hemkarliship ish élip baridighan bolup, uning amérikada panahliq tilesh qatarliq qanuniy resmiyetlirige adwokat kimbérléy motléy xanim mes'ul bolidiken. Ablikimni qarshi élishqa chiqqan kimbérléy xanim, bu özining tunji qétim bir Uyghur musapirgha yardem bérishi ikenlikini bildürdi. U özining ablikimning barliq qanuniy hoquqlirining qoghdilishigha kapaletlik qilish xizmitining ablikimning arzusi boyiche élip bérilidighanliqini bildürdi.

Amérika tashqi ishlar ministirliqining xitaygha qayturulush weziyitide qalghan ablikimning qisqa muddet ichide 3- bir dölettin amérikagha ghelibilik élip kélishige körsetken yardimini " Bir möjize xaraktérlik ish" dégen adwokat nuri türkel yene: "Amérikaning bu mesilige bundaq jiddiy mu'amile qilishidin Uyghur mesilisining amérika tashqi munasiwitide qandaq muhim yerge kelgenlikinimu körsitip béridu" dep tekitlidi. Nuri ependi yene, buning Uyghurlargha zor ilham bergen bir weqe ikenlikini, emma Uyghurlarning mushu xil hayat- mamatliq krizistin qutulushqa qarighularche, qanunsiz yollar bilen tewekkül qilmasliqi kéreklikini eskertti.

Pakistanda özini bixeter hés qilmighanliqi üchün 31 -iyul küni kechte pakistan - doha - sarayéwo ulanma uchush béliti bilen xitay pasporti arqiliq wizisiz kirgili bolidighan bosniyege qarap yol alghan ablikim, 2-awghust küni bosniye paytexti sarayéwogha chüshken. Emma bosniye terep uni chégradin kirgüzmestin, qatar awi'atsiye shirkitining ayropilani bilen dohagha qayturuwetken. U doha xelq'ara ayridromigha yétip kelgende, qatar da'iriliri uning 3-awghust etigen sa'et 11:00 de béyjinggha qayturulidighanliqini uqturghan. Xitaygha qayturulush xewpide qalghan ablikimning doha ayridromida ijtima'iy taratqular arqiliq tarqatqan uchurigha inkas qayturup, uning ehwalini taratqular arqiliq tarqatqan we uning terjimanliq ishlirida yardemleshken tahir imin, " Özining bir Uyghurning hayati xirisqa uchrighanda Uyghurlarning méhri muhebbetlik hemkarliq rohidin tesirlen'genliki shundaqla bu rohning ablikim yüsüp weqesining eng ehmiyetlik teripi dep qaraydighanliqi" ni otturigha qoydi.

Ablikim yüsüp, özining pakistandin Uyghur diyarigha qaytmay, üchinchi bir döletke kétishke tewekkül qilishidiki sewebler heqqide toxtilip, yéqinqi mezgillerde xitayning pakistandin Uyghurlarni qayturup kétiwatqanliqi, özining banka hésabatlirining tonglitishi we yene xitaylarning pakistanliq qizlargha yalghan öylinip, adem qachaqchiliqi qilish weqeliri pash bolghandin kéyin, ghezeplen'gen pakistanliqlarning xitay puqralirigha hujum qilish weqelirining köpiyiwatqanliqi qatarliq seweblerdin özining pakistanda dawamliq turushining xeterlik ikenlikini hés qilghanliqini bildürdi. Gerche, ablikim yüsüp amérikagha saq -salamet halda yalghuz yétip kéliwalghan bolsimu, u yenila özining pakistanda qalghan ayali we 5 yashliq balisining bixeterlikidin endishe qilmaqtiken.

Toluq bet