Америка ташқи ишлар әмәлдари: "хитайда һөкүмәтниң өзи адәм әткәсчиси"

Мухбиримиз ирадә
2021-08-02
Share
Америка ташқи ишлар әмәлдари: Америка ташқи ишлар министирлиқиниң адәм әткәсчиликини назарәт қилиш вә униңға зәрбә бериш ишханисиниң мувәққәт мудири кәрий җонстон(Kari Johnstone) ханим.
state.gov

Америка һөкүмәт әмәлдарлири америка сода уюшмисиниң йиғинида тиҗарәт саһәсини мәҗбурий әмгәктин йирақ турушқа йәнә бир қетим чақирди. 30-Июл күни уюштурулған "тәминләш зәнҗиридики мәҗбурий әмгәккә тақабил туруш" мавзулуқ йиғинда америка ташқи ишлар министирлиқи, америка сода вәкиллири ишханиси вә дөләт бихәтәрлик министирлиқиниң вәкиллири қатнашти. Улар сөзлиридә америкадики сода саһәсини тәминләш зәнҗирлириниң мәҗбурий әмгәктин булғанмиған болушиға капаләтлик қилишқа чақирди. Улар сөзлиридә нуқтилиқ һалда хитай һөкүмитиниң уйғурларға қаритиватқан мәҗбурий әмгәк сиясити һәққидә тохталди.

Америка ташқи ишлар министирлиқиниң адәм әткәсчиликини назарәт қилиш вә униңға зәрбә бериш ишханисиниң мувәққәт мудири кәрий җонстон болса йиғинда қилған сөзидә уйғур мәҗбурий әмгики үстидә тохталғанда "хитайда һөкүмәтниң өзи адәм әткәсчиси", деди. У мундақ деди: "хитайда һөкүмәт қоллиши астидики мәҗбурий әмгәк сиясити мәвҗут. Хитай йәнә бир милйондин ошуқ уйғур вә башқа аз санлиқ милләтләргә қаритилған кәң көләмлик тутқун һәрикити давамлашмақта. Мәҗбурий әмгәк җинайити шинҗаңдин хитайниң нурғун җайлириға кеңәйди. Хитайда һөкүмәтниң өзи адәм әткәсчиси".

Кәрий җонстон ханим сөзидә хитай һөкүмитиниң тутқунларға тән җазаси бериш, мәҗбурий дора бериш вә җисний зораванлиқ қатарлиқ зорлаш васитилири билән ишләшкә мәҗбурлап, кийим-кечәк, аяқ, гиләм вә қуяш енергийәси хам материяллирини ишләп чиқириватқанлиқини билдүрди. У йәнә мундақ деди:

"хитай йүргүзүватқан мәҗбурий әмгәк пәқәт җинайәт болупла қалмастин, бәлки бундақ әрзан баһада мәҗбурий әмгәккә селиш асасида ишләпчиқирилған маллар йәршари тәминләш зәнҗирлиридиму адаләтсиз риқабәт пәйда қилиду, бу америкалиқ әмгәкчиләргә вә шундақла мәҗбурий әмгәк җинайитигә билип-билмәй ортақ болуп қеливатқан америка хәлқи вә ширкәтлири үчүн интайин зиянлиқ".

Кәрий ханим байдин һөкүмитиниң мәҗбурий әмгәкни аяғлаштуруш мәсилисигә интайин көңүл бөлүватқанлиқини тәкитлиди вә йеқинда американиң 6 һөкүмәт аппаратиниң бирликтә "шинҗаң тәминләш зәнҗиригә мунасивәтлик йеңиланған сода көрсәтмиси" елан қилғанлиқини, хитай һөкүмитиниң мәҗбурий әмгәкни зулум қилишниң бир хил васитиси сүпитидә қоллинидиғанлиқини әскәрткәнликини, мәҗбурий әмгәк ишлитидиған ширкәтләр билән тиҗарәт қилғанда қануний җавабкарлиққа тартилиши мумкинлики һәққидә агаһландуруш берилгәнликини билдүрди.

Арқидин йиғинда америка сода вәкили ишханисидин җош кейгин әпәнди сөз қилди. У сөзиниң бешидила байдин һөкүмитиниң мәҗбурий әмгәкни аяғлаштуруш мәсилисигә интайин әһмийәт бериватқанлиқини, өзиниң сөзиниңму асасий нуқтисиниң сода вәкиллири ишханисиниң мәҗбурий әмгәкни аяғлаштуруш җүмлидин уйғур мәҗбурий әмгикини аяғлаштурушқа болған қәтий нийитини тәкитләш болидиғанлиқини билдүрди. У "америка ширкәтлириниң мәҗбурий әмгәкни аяғлаштуруштики роли интайин зор" деди. У мундақ деди:

"биз бу хизмәтлиримиздә тиҗарәт саһәсиниң мәҗбурий әмгәкни аяғлаштуруштики зор ролини муәййәнләштүргән асаста бу саһә билән йеқиндин һәмкарлишишни халаймиз. Сода вәкилләр ишханиси мәҗбурий әмгәк билән ишләпчиқирилған малларни чәкләшни асас қилған тиҗарәт принсиплирини давамлиқ тәшәббус қилиду. Адил риқабәт вә қанун асасидики тиҗарәт системиси қуруп чиқиш үчүн достлиримиз вә тиҗарәт шериклиримиз билән йеқиндин һәмкарлишиду. Мәҗбурий әмгәк билән ясалған таварларниң у системиға киришигә йол қоюлмайду".

У сөзи давамида америка сода вәкилләр ишханисиниң "шинҗаң тәминләш зәнҗиригә мунасивәтлик йеңиланған сода көрсәтмиси" ни елан қилған 6 һөкүмәт аппаратиниң бири икәнликини, буниң өзлириниң уйғур мәҗбурий әмгикини аяғлаштуруш нийитиниң қәтийликини намаян қилидиғанлиқи вә бундин кейин йәниму көп хизмәтләрни қилидиғанлиқини әмма буниң үчүн тиҗарәт саһәсиниң йеқиндин қоллишиға еһтияҗи барлиқини билдүрди.

Йиғинда йәнә, америка дөләт бихәтәрлик министирлиқи (Department of Homeland Security) ниң тиҗарәткә мәсул муавин ярдәмчи катипи ерик чой сөз қилди. У сөзидә дөләт бихәтәрлик министирлиқи вә шундақла америка чегра вә таможна қоғдаш идарисиниң һазир адәм әткәсчилики вә мәҗбурий әмгәккә қарши туруш тиришчанлиқлирини һәссиләп күчәйткәнликини, буниң америка җиддий қараватқан мәсилиләрниң бири икәнликини билдүрди. У шундақла чегра вә таможна қоғдаш идарисигә охшаш мәмурий органларниң "чәтәлләрдики мәҗбурий әмгәккә хатимә бериш үчүн иқтисадий бесим билән тәминләйдиған үнүмлүк қорал" икәнликини билдүрди. У йәнә мундақ деди: "бу органларниң ахирқи вәзиписи америка санаитини, америка ишчилирини қоғдаш вә техиму яхши вә техиму бихәтәр америка иқтисади вә тәминләш зәнҗири системиси бәрпа қилиштур".

Ерик чойму сөзидә америка дөләт бихәтәрлики министирлиқиниң уйғур елидики мәҗбурий әмгәкни аяғлаштуруш йолидики йеңи сода көрсәтмисини қоллиған орунларниң бири икәнликини әскәртип туруп, министирлиқниң бу мәсилисидики қәтий позитсийәсини тәкитлиди.

Йиғин ахирида юқиридики сөз қилғучилар бирдәк америка һөкүмитидики һәрқайси мунасивәтлик органларниң америкаға кириватқан таварларниң мәҗбурий әмгәк асасида ишләп чиқирилған болмаслиқиға капаләтлик қилиш, тәминләш зәнҗирлиридики мәҗбурий әмгәкни аяғлаштуруш үчүн йеқиндин һәмкарлишидиғанлиқини вә бу җәһәттә давамлиқ йеңи тәдбирләрни алидиғанлиқини билдүрүшти.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт