Amérika tashqi ishlar emeldari: "Xitayda hökümetning özi adem etkeschisi"

Muxbirimiz irade
2021-08-02
Share
Amérika tashqi ishlar emeldari: Amérika tashqi ishlar ministirliqining adem etkeschilikini nazaret qilish we uninggha zerbe bérish ishxanisining muweqqet mudiri keriy jonston(Kari Johnstone) xanim.
state.gov

Amérika hökümet emeldarliri amérika soda uyushmisining yighinida tijaret sahesini mejburiy emgektin yiraq turushqa yene bir qétim chaqirdi. 30-Iyul küni uyushturulghan "Teminlesh zenjiridiki mejburiy emgekke taqabil turush" mawzuluq yighinda amérika tashqi ishlar ministirliqi, amérika soda wekilliri ishxanisi we dölet bixeterlik ministirliqining wekilliri qatnashti. Ular sözliride amérikadiki soda sahesini teminlesh zenjirlirining mejburiy emgektin bulghanmighan bolushigha kapaletlik qilishqa chaqirdi. Ular sözliride nuqtiliq halda xitay hökümitining Uyghurlargha qaritiwatqan mejburiy emgek siyasiti heqqide toxtaldi.

Amérika tashqi ishlar ministirliqining adem etkeschilikini nazaret qilish we uninggha zerbe bérish ishxanisining muweqqet mudiri keriy jonston bolsa yighinda qilghan sözide Uyghur mejburiy emgiki üstide toxtalghanda "Xitayda hökümetning özi adem etkeschisi", dédi. U mundaq dédi: "Xitayda hökümet qollishi astidiki mejburiy emgek siyasiti mewjut. Xitay yene bir milyondin oshuq Uyghur we bashqa az sanliq milletlerge qaritilghan keng kölemlik tutqun herikiti dawamlashmaqta. Mejburiy emgek jinayiti shinjangdin xitayning nurghun jaylirigha kéngeydi. Xitayda hökümetning özi adem etkeschisi".

Keriy jonston xanim sözide xitay hökümitining tutqunlargha ten jazasi bérish, mejburiy dora bérish we jisniy zorawanliq qatarliq zorlash wasitiliri bilen ishleshke mejburlap, kiyim-kéchek, ayaq, gilem we quyash énérgiyesi xam matériyallirini ishlep chiqiriwatqanliqini bildürdi. U yene mundaq dédi:

"Xitay yürgüzüwatqan mejburiy emgek peqet jinayet bolupla qalmastin, belki bundaq erzan bahada mejburiy emgekke sélish asasida ishlepchiqirilghan mallar yershari teminlesh zenjirliridimu adaletsiz riqabet peyda qilidu, bu amérikaliq emgekchilerge we shundaqla mejburiy emgek jinayitige bilip-bilmey ortaq bolup qéliwatqan amérika xelqi we shirketliri üchün intayin ziyanliq".

Keriy xanim baydin hökümitining mejburiy emgekni ayaghlashturush mesilisige intayin köngül bölüwatqanliqini tekitlidi we yéqinda amérikaning 6 hökümet apparatining birlikte "Shinjang teminlesh zenjirige munasiwetlik yéngilan'ghan soda körsetmisi" élan qilghanliqini, xitay hökümitining mejburiy emgekni zulum qilishning bir xil wasitisi süpitide qollinidighanliqini eskertkenlikini, mejburiy emgek ishlitidighan shirketler bilen tijaret qilghanda qanuniy jawabkarliqqa tartilishi mumkinliki heqqide agahlandurush bérilgenlikini bildürdi.

Arqidin yighinda amérika soda wekili ishxanisidin josh kéygin ependi söz qildi. U sözining béshidila baydin hökümitining mejburiy emgekni ayaghlashturush mesilisige intayin ehmiyet bériwatqanliqini, özining söziningmu asasiy nuqtisining soda wekilliri ishxanisining mejburiy emgekni ayaghlashturush jümlidin Uyghur mejburiy emgikini ayaghlashturushqa bolghan qet'iy niyitini tekitlesh bolidighanliqini bildürdi. U "Amérika shirketlirining mejburiy emgekni ayaghlashturushtiki roli intayin zor" dédi. U mundaq dédi:

"Biz bu xizmetlirimizde tijaret sahesining mejburiy emgekni ayaghlashturushtiki zor rolini mu'eyyenleshtürgen asasta bu sahe bilen yéqindin hemkarlishishni xalaymiz. Soda wekiller ishxanisi mejburiy emgek bilen ishlepchiqirilghan mallarni chekleshni asas qilghan tijaret prinsiplirini dawamliq teshebbus qilidu. Adil riqabet we qanun asasidiki tijaret sistémisi qurup chiqish üchün dostlirimiz we tijaret shériklirimiz bilen yéqindin hemkarlishidu. Mejburiy emgek bilen yasalghan tawarlarning u sistémigha kirishige yol qoyulmaydu".

U sözi dawamida amérika soda wekiller ishxanisining "Shinjang teminlesh zenjirige munasiwetlik yéngilan'ghan soda körsetmisi" ni élan qilghan 6 hökümet apparatining biri ikenlikini, buning özlirining Uyghur mejburiy emgikini ayaghlashturush niyitining qet'iylikini namayan qilidighanliqi we bundin kéyin yenimu köp xizmetlerni qilidighanliqini emma buning üchün tijaret sahesining yéqindin qollishigha éhtiyaji barliqini bildürdi.

Yighinda yene, amérika dölet bixeterlik ministirliqi (Department of Homeland Security) ning tijaretke mes'ul mu'awin yardemchi katipi érik choy söz qildi. U sözide dölet bixeterlik ministirliqi we shundaqla amérika chégra we tamozhna qoghdash idarisining hazir adem etkeschiliki we mejburiy emgekke qarshi turush tirishchanliqlirini hessilep kücheytkenlikini, buning amérika jiddiy qarawatqan mesililerning biri ikenlikini bildürdi. U shundaqla chégra we tamozhna qoghdash idarisige oxshash memuriy organlarning "Chet'ellerdiki mejburiy emgekke xatime bérish üchün iqtisadiy bésim bilen teminleydighan ünümlük qoral" ikenlikini bildürdi. U yene mundaq dédi: "Bu organlarning axirqi wezipisi amérika sana'itini, amérika ishchilirini qoghdash we téximu yaxshi we téximu bixeter amérika iqtisadi we teminlesh zenjiri sistémisi berpa qilishtur".

Érik choymu sözide amérika dölet bixeterliki ministirliqining Uyghur élidiki mejburiy emgekni ayaghlashturush yolidiki yéngi soda körsetmisini qollighan orunlarning biri ikenlikini eskertip turup, ministirliqning bu mesilisidiki qet'iy pozitsiyesini tekitlidi.

Yighin axirida yuqiridiki söz qilghuchilar birdek amérika hökümitidiki herqaysi munasiwetlik organlarning amérikagha kiriwatqan tawarlarning mejburiy emgek asasida ishlep chiqirilghan bolmasliqigha kapaletlik qilish, teminlesh zenjirliridiki mejburiy emgekni ayaghlashturush üchün yéqindin hemkarlishidighanliqini we bu jehette dawamliq yéngi tedbirlerni alidighanliqini bildürüshti.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet